Ilijana Ivanova, anëtare e Zyrës Evropiane të Auditimit, është propozimi i GERB-it për një komisioner evropian bullgar i cili të zëvendësojë ministren e jashtme aktuale Maria Gabriel, që  dha dorëheqje si komisionere evropiane, njoftoi kreu i GERB-it, Bojko Borisov. Ivanova është "një fytyrë shumë e njohur në Bruksel". “Po e vazhdojmë ndryshimin” (PP) nuk kanë familje politike në Parlamentin Evropian, prandaj është logjike që komisioneri evropian të jetë nga GERB, nga fituesit e zgjedhjeve, tha Borisov. “Komisioni Evropian do të vendosë, por mendoj se kandidati ynë është më i mirë”, theksoi lideri i GERB-it.

Deputeti Daniel Lorer konfirmoi se është kandidati i PP-së për komisioner evropian dhe tha se pret që Bullgaria të marrë në Komisionin Evropian resorin aktual të Gabrielit - komisioner evropian përgjegjës për inovacionet, kërkimet shkencore, kulturën, arsimin dhe rininë.

Pak më vonë, zëdhënësja e KE-së, Dana Spinant, deklaroi se Komisioni nuk ka marrë njoftim nga autoritetet bullgare për dy nominimet e komisionerëve evropianë.

Ajo kujtoi se kryetarja e KE-së, Ursula von der Leyen, u ka dërguar një letër autoriteteve bullgare, në të cilën ka kërkuar dy emra.

Spinant sqaroi se dy nominimet i ka parë vetëm në lajme dhe deklaroi se resori do të komentohet në një fazë të mëvonshme.