Presidenti Rumen Radev ka vënë veton ndaj disa prej ndryshimeve në Ligjin për Mbrojtjen dhe Forcat e Armatosura të Republikës së Bullgarisë, të miratuara më 30 tetor, njoftoi zyra e shtypit e kreut të shtetit. Në arsyet e tij, ai thekson se ndryshimet e miratuara, megjithëse ndjekin qëllime të rëndësishme mbrojtëse, në praktikë mund ta përkeqësojnë problemin e mungesës së burimeve njerëzore në ushtri dhe duhet të rishqyrtohen nga ligjvënësi.

Sipas Rumen Radev, praktika aktuale legjislative e rritjes së kufirit të moshës për shërbimin ushtarak nuk ka çuar në një zgjidhje të problemit të mungesës së personelit në Forcat e Armatosura, por ka krijuar edhe parakushte për ngecje në sistem, ngecje në rinovimin e stafit komandues dhe në pamundësinë e zhvillimit të personelit të stafit të oficerëve. "Ndryshimet në metodat e raportimit dhe kompensimit për kohën e shërbimit dhe procedura e re për përdorimin e lejes janë një parakusht për dëmtimin e personelit ushtarak dhe krijojnë kushte për demotivim shtesë", deklaroi presidenti.

Në arsyet e tij, kreu i shtetit thekson gjithashtu se janë ndërmarrë hapa në drejtimin e duhur, që synojnë përmirësimin e koordinimit midis autoriteteve kompetente në fushën e mbrojtjes, si dhe krijimin e rregulloreve në lidhje me aktivitetet e Komandës së Lartë Supreme.

Redaktoi: Diana Cankova

Përgatiti në shqip dhe publikoi: Vesella Mançeva

Foto: Facebook/Rumen Radev