Renaldo Mandmets: “Tashmë nuk kam frikë se Bullgaria mund të humbasë shumë para nga programi operativ “Zhvillimi rajonal”

botuar më 10-06-07 11.16.PD

Gjatë të dhjetë muajve të qeverisjes së kabinetit Borisov në kuadër të programit operativ “Zhvillimi rajonal” në Bullgari janë lidhur marrëveshje për 1 miliard e 355 milionë leva (675 milionë euro). Kjo përbën 43% të zbatimit të programit, kurse qëllimi është që deri në fund të këtij viti të arrihen 50%. Ky është rezultat i përpjekjeve të mëdha, tha ministri i zhvillimit rajonal Rosen Plevneliev në seancën e gjashtë të Komitetit mbikëqyrës të programit operativ “Zhvillimi rajonal” që u zhvillua në Sofje në fund të javës ës kaluar. Në të mori pjesë udhëheqësi për Bullgarinë në kryedrejtorinë “Zhvillimi rajonal” të KE-së Renaldo Mandmets, i cili i dha një vlerësim shumë të mirë zbatimit të programit.

“Mund të them se tashmë nuk kam frikë se Bullgaria mund të humbasë shumicën e mjeteve të këtij programi – tha Renaldo Mandmets. – Jemi të kënaqur dhe nga procesi i institucionalizimit. Kemi arsye të krenohemi me këtë që keni bërë. Gjatë vitit të fundit keni arritur një përparim të madh. Vizitova disa objekte, pashë si zbatohen disa projekte që financohen nga programi. U takova me autoritetet vendore. Mendoj se ka shembuj të mrekullueshëm që tregojnë si duhet të përvetësohen paratë e tatimpaguesve evropianë.”

Çfarë tjetër mund dhe duhet të arrihet?

“Veçanërisht në fushën e transportit duhet të shpejtohen veprimet – rekomandoi zoti Mandmets. – Duhet të shtohet dhe kapaciteti administrativ. Me mjetet për ndihmë teknike mund të trajnohen nëpunësit në Ministrinë e Zhvillimit Rajonal të Bullgarisë. Komunikimi i deritanishëm midis drejtorisë së KE-së dhe organeve përgjegjëse të Bullgarisë është shumë i suksesshëm. Tani reagimi në Bullgari i pyetjeve tona është shumë i shpejtë. Marrim një e-mail me përgjigjet për 2-3 orë.”

Sipas ministrit të zhvillimit rajonal Rosen Plevneliev programi operativ “Zhvillimi rajonal” është shumë i rëndësishëm për Bullgarinë, sepse ndihmon sektorë të tërë të ekonomisë bullgare – transportin, energjetikën, ndërtimin dhe turizmin. Ai theksoi se gjatë të dhjetë muajve të fundit punohet 6 herë më shpejt dhe përpjekjet kanë rezultate konkrete:

“Duke udhëtuar nëpër vend, tashmë shohim tabelat me mbishkrim “Financuar nga programi operativ “Zhvillimi rajonal” – tha ministri Plevneliev. – Shohim projekte konkrete që zbatohen në Bullgari – shkolla dhe kopshte fëmijësh, institute sociale dhe kulturore. Shohim dhe rrugë evropiane. Besoj se ne të gjithë e kuptojmë sa të rëndësishme janë këto rezultate në situatën, në të cilën po gjendemi, dhe sa e rëndësishme është pozita e njerëzve që e administrojnë këtë program. Kriza ekonomike në Bullgari është një sfidë e madhe për ekonominë tonë. Në këtë situatë të rëndë kemi ndihmë nga fondet evropiane, por kjo ndihmë përvetësohet me përpjekjet e institucioneve përgjegjëse bullgare.”

Përgatiti në shqip: Ekaterina Tarpomanova

По публикацията работи: Tatjana Obretenova

Последвайте ни и в Google News Showcase, за да научите най-важното от деня!

Ndaje

Renaldo Mandmets: “Tashmë nuk kam frikë se Bullgaria mund të humbasë shumë para nga programi operativ “Zhvillimi rajonal”

Më shumë nga rubrika

Ka pasur shumë interes për kontrollet mjekësore të organizuara nga Bullgaria në Kukës të Shqipërisë

Daniill është emri i patrikut të ri bullgar

Kisha Ortodokse Bullgare do të zgjedhë patriark të ri

Zotërimi i gjuhës së shenjave mund të jetë interesant, i këndshëm dhe shumë i dobishëm

"Trabant Fest" në Tetevenin Ballkanik

Java e kinologjisë në Burgas