Sot, 27 tetor, në Bullgari nga ora 07:00 deri në orën 20:00 po zhvillohet raundi i parë i zgjedhjeve vendore për kryetarë dhe këshilltarë bashkie në gjithsej 265 bashki. Në Komisionin Qendror të Zgjedhjeve janë regjistruar 66 parti, koalicione dhe kandidatë të pavarur, ndërsa për besimin e zgjedhësve do të konkurrojnë afro 12 000 kandidatë për kryetarë bashkie dhe mbi 36 000 kandidatë për këshilltarë bashkie. Të drejtën e votimit, ose të drejtën e zgjedhjes për vendbanimin përkatës e kanë të gjithë qytetarët, të cilët kanë banuar atje të paktën gjatë gjashtë muajve të fundit. Votuesit, të cilët e kanë ndryshuar adresën e tyre pas datës 26 prill, kanë të drejtën e votimit në vendbanimin e tyre të mëparshëm. Shtetasit e huaj gjithashtu kanë të drejtën e votimit, ose të zgjedhjes, por ata duhet të kenë status të qëndrimit të përhershëm në Bullgari dhe gjithashtu duhet të kenë banuar 6 muaj në bashkinë përkatëse. Kandidatët për kryetarë, ose këshilltarë bashkie mund të kalojnë në raundin e dytë në qoftë se grumbullojnë 50 për qind prej votave të vlefshme. Për mirëmbajtjen e rendit në ditën zgjedhore janë angazhuar rreth 14 000 nëpunës të Ministrisë së Punëve të Brendshme.