Shefi i Shtabit Operativ Kombëtar dhe i Akademisë Ushtarake -Mjekësore – gjeneral-majori prof. Vencisllav Mutafçijksi shpalli të dielën në mëngjes se rastet e regjistruara të koronavirusit në Bullgari tashmë janë 43. Pacientët që mjekohen në spital janë në gjendje të mirë, ndërsa të vdekurit janë dy. Duke e komentuar situatën në regjion profesori theksoi se ajo është shumë serioze në Greqi, ku për 24 orë numri i të infektuarve është rritur nga 190 në 228. Në Shqipëri rastet janë 38, në Bosnjë e Hercegovinë – 21, në Rumani – 123, në Maqedoninë e Veriut – 19, në Serbi – 46. Autoritetet bullgare rekomandojnë që të mos udhëtohet deri në Spanjë dhe forcojnë kontrollin kufitar për bashkatdhetarët tanë që banojnë atje. Po rritet edhe numri i personave që duhet të vendosen në karantinë të detyrueshme. MPJ-ja ndërmerr masa më serioze për personat që mbërrijnë nga jashtë dhe formon grupe për kërkimin e atyre për të cilët ka dyshime se janë infektuar. Përgatitja e spitaleve për përballimin e situatës së rëndë në lidhje me përhapjen e koronavirusit po vazhdon. Fushata për tërheqjen e vullnetarëve në spitalin “Aleksandrovska” jep rezultat të shkëlqyeshëm. Një proces të tillë ka edhe në Akademinë Ushtarake-Mjekësore.