Bullgaria shprehu keqardhje që pasi më 16 dhjetor vendet anëtare të BE-së miratuan konkluzionet e Këshillit të BE-së mbi Procesin e Zgjerimit, Çekia dhe Sllovakia papritmas bllokuan tekstin duke deklaruar se ai është i pakënaqshëm, transmetoi BTA.

Në konkluzionet me këmbënguljen e Bullgarisë u regjistrua rëndësia e marrëveshjeve të Maqedonisë së Veriut me Bullgarinë dhe Greqinë dhe se aplikimi i tyre do t’u japë fund të gjitha pretendimeve të bazuara mbi interpretimin e gabuar të historisë.

“Vetoja mbi konkluzionet e Këshillit kërcënon të minojë besimin në BE dhe pengon që BE t’i përcjellë sinjalet aq të domosdoshme Ballkanit Perëndimor për të stimuluar reformat që vendet kandidate duhet të realizojnë” theksohet në pozitë.

Nga Ministria e Punëve të Jashtme saktësojnë se konkluzionet e Këshillit të BE-së për zgjerimin nuk kanë asgjë të përbashkët me procesin e miratimit të kornizave negociuese me Shqipërinë dhe Maqedoninë e Veriut.

Bullgaria përkrah kornizën negociuese për Shqipërinë dhe mirëpret kohën e siguruar suplementare për përmirësimin e kornizës negociuese për Maqedoninë e Veriut.