Ky ishte votimi i tretë i paprecedentë për Parlament, së bashku me atë për President, në një situatë të paprecedentë të një pandemie globale me të gjitha krizat që rezultuan, të cilat ndikuan në ndjenjën e pasigurisë së bullgarëve dhe rrjedhimisht në rezultatet e votimit. Këto janë fjalë të politologut të ri Nedellço Mihajllov. Ai jeton në Hagë të Holandës, ku është diplomuar për shkenca politike dhe aktualisht po ndjek studimet master për menaxhimin e krizave dhe sigurinë kibernetike në një nga fakultetet e universitetit më të vjetër të vendit, Universiteti i Lejdenit.
Befasimet e zgjedhjeve politologu 22 vjeç i komentoi kështu:
“Bullgari ndjen nostalgji për kohën para pandemisë. Një pjesë e elektoratit dëshiron të rifitojë atë ndjenjë sigurie nga përpara Covid. Kjo shpjegon ruajtjen e bërthamës së fortë të të ashtuquajturave “parti të statukuos” të përfaqësuara nga GERB dhe Lëvizja për të Drejtat dhe Liritë /DPS/. Sepse votuesi mund të mos jetë plotësisht i kënaqur me drejtuesit e tyre, por ai shpreson tek ata se do ta kthejnë prapa sigurinë e humbur." Sipas Mihajllovit, ndjenja e pasigurisë shpjegon hyrjen në Parlament të një lojtari të ri – të partisë ekstreme nacionaliste “Ringjallja” /“Vëzrazhdane”/, lideri i së cilës gjatë gjithë fushatës fliste për "sovranitetin", "traditat bullgare" dhe premtoi një rikthim në normalitet nga ditët para koronavirusi, apo ditët e largëta kur Bullgaria ka qenë një vend i lavdishëm.
Rezultati i raundit të dytë të zgjedhjeve presidenciale është shumë i rëndësishëm, është i mendimit politologu. Në të përballen me njëri-tjetrin Presidenti aktual Rumen Radev dhe kandidati i mbështetur nga GERB, Anastas Gerxhikov. Nëse Gerxhikov humbet në raundin e dytë, mund të presim rënien e partisë GERB dhe të liderit të saj Bojko Borisov në vitet e ardhshme, parashikon politologu i ri.
Sipas tij, suksesi befasues i partisë "Po e vazhdojmë ndryshimin", e cila fitoi zgjedhjet parlamentare, është kryesisht për shkak të fushatës së saj pozitive. Por jo vetëm. Drejtuesit e saj arritën të krijojnë dhe të organizojnë një parti në kuadrin e një muaji e gjysmë dhe të zënë vendin e parë në votim, duke thyer monopolin e Partisë Socialiste Bullgare /BSP/ në spektrin e majtë politik, shton Nedellço Mihajllov. Sipas tij, edhe pse në fushatën e tyre “Po e vazhdojmë ndryshimin” mbështeteshin tek ide shumë të afërta me ato të BSP-së dhe gjatë gjithë kohës deklaronin se do të përdornin “mjetet e djathta për qëllime të majta”, në praktikë qëllimet e tyre janë të majta. “Prandaj unë i vendos në spektrin e majtë politik, edhe pse disa sociologë i konsiderojnë si centristë”, tha bashkatdhetari ynë nga Holanda. Ai shtoi se kjo thyerje e monopolit të majtë të BSP-së mund të shpjegohet edhe me tendencat ndërkombëtare që lidhen me "erën e majtë", që filloi të fryjë në vende si Gjermania, Spanja, Portugalia, si dhe jashtë Evropës.
Megjithatë, ka dritë në tunel, edhe pse të zbehtë. Nedellço Mihajllov pret që mosmarrëveshjet dhe pasionet partiake të mos e pengojnë të ashtuquajturat “Parti të ndryshimit” për të formuar një qeveri… Ose të paktën të përpiqen:
“Koalicioni qeverisës do të formohet rreth disa detyrave të rëndësishme, siç janë zgjidhja e krizave dhe pastrimi i niveleve të larta të pushtetit nga korrupsioni. Kjo ishte në qendër të retorikës së shumë partive, duke përfshirë dhe zhvillimin e reformave të rëndësishme në drejtësi, miratimin e buxhetit për vitin 2022 dhe përgatitjen e shtetit për thithjen e subvencioneve nga marrëveshja e gjelbër. Por, duke marrë parasysh rezultatet paraprake të votimit, këto parti të ndryshimit nuk do të mund të qeverisin pa pjesëmarrjen e BSP-së. Do të ketë dallime serioze mes tyre dhe ato do të pengojnë realizimin e një mandati të plotë të koalicionit të ardhshëm eventual” – tha në përfundim politologu i ri Nedellço Mihajllov.
Përgatiti në shqip: Vesella Mançeva
Nxënësit tani mund të testojnë në internet aftësitë e tyre për zgjidhjen e problemeve nga studimi ndërkombëtar PISA. Ministria e Arsimit dhe Shkencës krijoi një modul në faqen e saj të internetit me një lidhje me platformën speciale . Ajo përmban..
At Ljubomir Bratoev ishte pjesëmarrës i drejtpërdrejtë në ngjarjet e themelimit të bashkësisë së kishës ortodokse bullgare në Berlin. Ai mbërriti në kryeqytetin e Gjermanisë Lindore në fund të viteve 1980 të shekullit të ХХ-të për të bërë doktoraturën...
Një ekspozitë interesante në Kuvendin Popullor në Sofje prezanton jetën dhe veprën e Ekzarkut Stefan I Bullgar - një figurë kozmopolite që hyri në histori si luftëtar i distancimit të priftërinjve nga jeta politike, dhe si një nga shpëtimtarët e..
Instituti mbi Kërkimin e Klimës, Atmosferës dhe Ujit pranë Akademisë Bullgare të Shkencave (IIKAV-BAN) po organizon një konferencë dhe një ngjarje..
Për të tretin vit radhazi në Bullgari do të mbahet konkursi ndërkombëtar i gatimit “Luga e Kupidit”. Konkursi i shijshëm ka një mision - të tregojë se..
Gjithsej 59 persona humbën jetën dhe 155 u plagosën nga zjarri gjatë një koncerti të grupit të njohur “DNA” që shpërtheu mbrëmë në diskotekën..