Me 547 vota pro, 49 kundër dhe 43 abstenime, Parlamenti Evropian miratoi një rezolutë në të cilën ngulet këmbë që Këshilli i BE-së të lejojë Bullgarinë dhe Rumaninë të bëhen pjesë e Shengenit deri në fund të vitit. Në dokument, eurodeputetët shprehin “habinë” që Këshilli nuk ka vendosur për pranimin e dy vendeve, megjithëse ato i kanë plotësuar kushtet e nevojshme që nga viti 2011, njoftoi korrespondentja e BNR në Bruksel, Angelina Piskova.

“Mbajtja e kontrollit të kufijve të brendshëm është diskriminuese dhe ndikon seriozisht në jetën e punëtorëve të lëvizshëm dhe të qytetarëve”, thonë deputetët. Ata shtojnë se kontrolli i brendshëm kufitar ndikon negativisht në funksionimin e tregut të përbashkët, duke penguar importin, eksportin dhe lëvizjen e lirë të mallrave.

Eurodeputetët tashmë bënë thirrje që Bullgaria dhe Rumania të pranohen në Shengen në dy rezoluta - nga vitet 2018 dhe 2020, si dhe në një raport nga viti 2021. Pranimi i vendeve të reja në Shengen kërkon një vendim unanim të Këshillit të BE-së.