Më 18 nëntor 2022, Bullgaria dorëzoi në Gjykatën Ndërkombëtare të Drejtësisë të OKB-së në Hagë një Deklaratë për përfshirje në padinë e Ukrainës kundër Federatës Ruse sipas Konventës për Parandalimin dhe Dënimin e Krimit të Gjenocidit. Këtë e njofton  në faqen e saj Ministria e Punëve të Jashtme të Bullgarisë. Dorëzimi i deklaratës është në përputhje me vendimin e Kuvendit Popullor të datës 3 nëntor të këtij viti, thuhet në sajt.

Kështu  Bullgaria bëhet vendi i 24-të në botë dhe i 20-ti në BE, që ndërhyri drejtpërdrejt në padinë e Ukrainës kundër Rusisë, thekson “Evropa e Lirë”. Padia  u ngrit me një ankesë nga Ukraina, e paraqitur disa ditë pas fillimit të agresionit rus. Moska e bojkotoi procesin. Sipas saj, ky proces nuk është në juridiksionin e Gjykatës Ndërkombëtare të Drejtësisë.