Liderët evropianë po mblidhen në takimin e tyre të fundit të vitit, ku do të diskutojnë edhe zhvillimin e luftës në Ukrainë. Pavarësisht rezistencës hungareze, Brukseli arriti të imponojë vendimin që në vitin 2023 Ukraina të marrë ndihmë financiare prej 18 miliardë eurosh. Krerët e shteteve do të diskutojnë se çfarë ndihme mund të vazhdojnë t’i japin Kievit në aspektet politike, ushtarake dhe humanitare, si dhe për rimëkëmbjen e infrastrukturës kritike pas sulmeve masive ruse.

Sistemet amerikane të mbrojtjes raketore “Patriot” do të jenë një objektiv legjitim i sulmeve ruse kundër Ukrainës, nëse SHBA-ja lejon që ato të furnizohen në Kiev, tha zëdhënësi i Kremlinit, Dmitrij Peskov. “Patriot” konsiderohet si një nga sistemet më të avancuara të mbrojtjes ajrore amerikane kundër avionëve, raketave lundruese dhe balistike. Ambasada ruse në Uashington paralajmëroi se dorëzimi i propozuar është një provokim dhe mund të ketë pasoja të paparashikueshme.

Pentagoni beson se një nga qëllimet e rritjes së fundit të sulmeve raketore ruse në Ukrainë është që të shterojë rezervat e mbrojtjes ajrore të Kievit, në mënyrë që Rusia të mund të dominojë qiejt mbi vend. Për këtë arsye, SHBA dhe aleatët e saj po furnizojnë Kievin me më shumë mjete të tilla, njofton Reuters.

Që nga fillimi i konfliktit, Uashingtoni i ka dhënë Ukrainës 19.3 miliardë dollarë ndihmë ushtarake.