Katër persona u arrestuan nga policia pas një sulmi kundër Monumentit të Ushtrisë Sovjetike në Sofje. 30-40 sulmuesit e maskuar hodhën tym dhe në kaosin e krijuar i nxorën me çekiç shkronjat nga monumenti. Një pankartë me mbishkrimin "Demontimi" u shpalos për një kohë të shkurtër. Në piedestalin e lyer me sprej shkruhet me shkronja të zeza: “Duam një monument bullgar”. Në kampin e zbrazët prej çadrash, të ngritur paligjshëm përpara memorialit, kanë mbërritur për të folur drejtuesit e partive të koalicionit “Majtas”, që kundërshtojnë heqjen e monumentit.

Administrata rajonale e Sofjes njoftoi se plani për sigurimin e monumentit është hartuar dhe i është dorëzuar për miratim Komunës së Sofjes.

Vendimi i Bashkisë Metropolitane është i qartë për zhvendosjen e Monumentit të Ushtrisë Sovjetike, që është pronë shtetërore. Këtë vendim ia dërgova guvernatorit të rajonit dhe tashmë ka veprime për zbatimin e këtij vendimi, tha kryetarja e Komunës së Sofjes, Jordanka Fandëkova. “Disa politikanë po e shfrytëzojnë zhvendosjen e Monumentit për efekt PR për zgjedhjet lokale. U bëj thirrje liderëve të formacioneve politike që protestojnë para monumentit që të respektojnë kërkesat e Ligjit për tubimet dhe mitingjet”, ka shtuar Fandëkova.

• Rriten pasionet rreth Monumentit të Ushtrisë Sovjetike në Sofje