Mbështetësit e partisë “Vëzrazhdane” protestuan përpara ndërtesës së Kuvendit dhe të Këshillit të Ministrave për të kërkuar dorëheqjen e qeverisë. Protesta u shpall kombëtare dhe njerëzit filluan të mblidhen pak para orës 12 të mesditës. Ata këmbëngulin për një referendum për ruajtjen e levës bullgare dhe deklarohen kundër ndryshimeve në Kushtetutë që synojnë "shpërbërjen e Bullgarisë". "Çfarë po ndodh? E shihni - Ukraina është në vend të parë, ne do ta mbrojmë Ukrainën deri në fund... Më falni, por ku është Bullgaria?", komentoi para gazetares së BNR Svetosllava Kuzmanova një pjesëmarrëse në protestë.

Prej aty, protestuesit u drejtuan për në Monumentin e rrethuar të Ushtrisë Sovjetike dhe u përpoqën të sulmonin gardhet nën shoqërimin e këngëve bullgare nga koha e Rilindjes, duke valëvitur flamuj bullgarë. Në vendngjarje kishte prezencë të shtuar të policisë. Pas kësaj, mbështetësit e “Vëzrazhdane” iu drejtuan Urës së Shqiponjave (Orllov Most) në kryeqytet dhe e bllokuan atë.

“Ne, bullgarët, duhet të vendosim se çfarë duhet të ndodhë në vendin tonë, jo disa ambasadorë”, deklaroi kreu i “Vëzrazhdane” Kostadin Kostadinov. Turma filloi të thërriste "Dorëheqje! Gjyq! Burg!". Prej andej, protestuesit marshuan nëpër rrugët qendrore të Sofjes, duke ndaluar trafikun dhe u mblodhën përpara tempullit “Shën Aleksandër Nevskit”, ku protestuesit filluan të shpërndaheshin.