Presioni i shtuar i qeverisë bullgare ndaj kompanive ruse bëri që “Lukoil” të nisë një procedurë për shitjen e rafinerisë së naftës në Burgas, tha për “Financial Times” ministri bullgar i financave Asen Vasilev. Tashmë ka “shenja interesi” nga një blerës potencial. Vetëm pas përfundimit të marrëveshjes, tatimi mbi fitimin për rafinerinë do të ulet nga 60% në 15%. Rreth 500 milionë euro do të kushtojë kalimi i prodhimit në naftë jo-ruse, shkruan botimi.

Kryeministri Nikollaj Denkov komentoi se nuk është e qartë nëse interesimi i shprehur për rafinerinë do të përfundojë me blerje dhe gjithçka varet nga pronari “Lukoil Bulgaria”. “Kur bëhet fjalë për një aset kaq të madh, ka mjaft faza përpara se të arrihet një marrëveshje përfundimtare e suksesshme”, shtoi kryeministri.

“Lukoil” Burgas është rafineria më e madhe ruse në Evropën Juglindore. Kompania eksporton më shumë se gjysmën e prodhimit të saj, ku shumica e karburantit dizel shkon në Ukrainë, saktëson “Financial Times”.