Abdullah Öcalan propozoi bisedime paqeje me PKK nga burgu

Lideri i Partisë terroriste të Punëtorëve të Kurdistanit (PKK), Abdullah Öcalan, i cili po vuan një dënim me burgim të përjetshëm, u vizitua nga një i afërm i tij për herë të parë pas 4,5 vitesh dhe përcolli mesazhin se është gati për bisedime paqeje me Ankaranë, raportoi NTV Haber. Öomer Öcalan, nipi i liderit rebel dhe një deputet nga Partia opozitare pro-kurde për Barazinë e Popullit dhe Demokracinë, tha se ai e ka vizituar xhaxhain e tij në burg në ishullin Imralı dhe i ka kërkuar atij t'i dërgojë mesazhin shoqërisë. "Nëse krijohen kushtet, unë kam fuqinë teorike dhe praktike për ta zhvendosur këtë proces nga toka e konfliktit dhe dhunës në një tokë ligjore dhe politike," ka thënë rebeli. Lajmi erdhi një ditë pas sulmit në fabrikën TUSAS, ku 5 persona humbën jetën dhe 20 u plagosën. Supozohet se sulmi është vepër e PKK-së.

Në 30 vjet, popullsia e Serbisë pritet të tkurret me mbi 22%

Instituti Kombëtar i Statistikave të Serbisë pret që popullsia në vitin 2052 të bjerë me 1.5 milionë njerëz në 5.2 milionë banorë krahasuar me vitin 2022, raporton BGNES. Në versionin më optimist të lindshmërisë së lartë pa migrim, popullsia do të jetë 5,5 milionë, në skenarin më pesimist, parashikimi është se pothuajse gjysma e serbëve do të jetojnë në 5 qytete: Beograd, Novi Sad, Nish, Kraguevac dhe Novi Pazar. Popullsia do të ulet më së shumti në rajonin e Borit me 55%, në Zaiçar me 50%, në rajonet e tjera me 30%. Popullsia e rajonit më të pasur serb të Vojvodinës pritet të zvogëlohet me një të katërtën. Bosilegradi, i populluar me popullsi etnike bullgare, është ndër 7 komunat demografikisht më të rrezikuara në Serbi. Parashikimi është që popullsia e komunës nga 6065 veta në 2022 të zvogëlohet në 1100 persona në vitin 2052. Gjatë së njëjtës periudhë, qytetarët e Caribrodit do të shkrihen në 2111 persona dhe në Surdulica deri në 4300.

Në Slloveni, refuzuan të thërrisnin një referendum për një termocentral të ri bërthamor

Parlamenti slloven hodhi poshtë një propozim për organizimin e një referendumi nëse të ndërtohet një termocentral i ri bërthamor pranë termocentralit ekzistues bërthamor Krško, raporton rtvslo.si. "Krško" është në pronësi të Sllovenisë dhe Kroacisë dhe funksionon që nga viti 1983. Në janar të vitit 2023 mori lejen për të zgjatur periudhën e funksionimit me 20 vjet deri në vitin 2043. 69 deputetë votuan "kundër" referendumit të propozuar dhe vetëm një "për". Grupet parlamentare kanë rënë dakord se mbajtja e një referendumi konsultativ do të ishte e papërgjegjshme në "rrethanat aktuale" dhe koalicioni qeverisës dhe opozita po akuzojnë njëri-tjetrin për llogari të fshehta rreth sondazhit. Sipas planeve, termocentrali i ri bërthamor JEK 2 me kapacitet 2400 megavate duhet të ndërtohet pranë atij të vjetër, i cili mbulon rreth 20% të nevojave të vendit për energji dhe rreth 16% të nevojave të Kroacisë.

Lexuesit e “National Geographic” zgjodhën Sarajevën si destinacionin më të mirë

Revista “National Geographic” publikon destinacionet më të mira në botë dhe kryeqyteti i Bosnje-Hercegovinës, Sarajeva, u shpall destinacioni më i mirë sipas zgjedhjes së lexuesve. "Me një histori shekullore të gërshetuar në bukurinë e tij natyrore, nuk është çudi që ky kryeqytet kozmopolit është kaq i dashur. Planifikoni vizitën tuaj për të provuar ofertat në tregjet lokale, shëtisni përgjatë lumit Miljacka dhe shijoni pamjet mahnitëse që ofron ky qytet”, shkruan revista në profilin e saj në Instagram. Ndër finalistët për destinacionin më të mirë të “National Geographic” ishin edhe qytete si Ho Chi Minh City në Vietnam, New Orleans në SHBA, Bodrum në Turqi dhe Cusco në Peru, vëren redaksia ballkanike e “Al Jazeera”, me qendër në Sarajevë.

Përpiloi: Ivo Ivanov

Foto: aa.com.tr, danas.rs, rtvslo.si, nationalgeographic.com

Përgatiti në shqip dhe publikoi: Vesella Mançeva