Operacioni “Oktapod” shthur rrjetin mafioz

botuar më 10-02-11 12.57.MD

Mbi 10 persona u arrestuan në operacionin policor “Oktapod”.

Foto: BGNES

Pas arrestimeve për vrasjen brutale në fillim të vitit të gazetarit me kontakte të dyshimta Bobi Cankov dhe operacionit të kapjes së grupit të “Brutalëve”, të cilët realizuan një sërë rrëmbimesh, Ministria Bullgare e Punëve të Brendshme zhvilloi akoma një operacion të suksesshëm me emrin “Oktapod” Këtë herë ka të ngjarë në arrest të gjendet një figurë me ndikim të madh në Agjencinë Shtetërore të Sigurisë Kombëtare, të krijuar nga ish qeveria e majtë pikërisht për të luftuar kriminalitetin e organizuar dhe korrupsionin në etazhet e larta të pushtetit.

Biografia e kësaj figure, Aleksej Petrov, është tipike për shumë prej njerëzve të suksesshëm në erën e postkomunizmit. Si shumica prej tyre ai është marrë me sporte luftarake – ka qenë prej sportistëve më të mirë të karatesë në Bullgari, ka zënë një post kryesor në shërbimet e tanishme sekrete, është lidhur me shumë firma me biznes më të ndryshëm, përfshi dhe të tilla që merren me sigurime. Ka media të veta, si dhe miq politikë me ndikim të madh. Pas largimit të tij me detyrim nga posti strategjik në Agjencinë Shtetërore të Sigurisë Kombëtare, Aleksej Petrov filloi të tërhiqet nga pjesëmarrja në firmat e veta dhe filloi punë si konsulent i kërkuar në fushën e problemeve të sigurisë, me honorarë, për të cilat supozohet se kapin një shumë prej milionë eurosh, ka punuar madje si pedagog në Universitetin për Ekonomi Kombëtare dhe Botërore. Ka dyshime se ka qenë shef i një grupazhi kriminal me hierarki të rreptë, i cili kontrollon biznesin me prostituta në Sofje dhe merret me shantazh, me grumbullim me forcë borxhesh, me fshehje të ardhurash, mospagim tatimesh dhe vjedhje të TVSH-së. Ka dyshime gjithashtu se është përzier në vjedhjen e mjeteve nga ndërmarrja më e madhe metalurgjike “Kremikovci”.

Sipas disa mediave kompleksi i notimit “Spartak”, selia e Aleksej Petrovit, është shndërruar në një Ministri private të Punëve të Brendshme, e cila ka grumbulluar informacion komprometues për politikanë dhe afaristë me qëllim shantazh. Thuhet gjithashtu se që të hakmerret për largimin e vet nga Agjencia Shtetërore e Sigurisë Kombëtare, Aleksej Petrov i ka bërë kurth ish shefit të tij Petko Sertov dhe ish kryeministrit Sergej Stanishev duke i dorëzuar personalisht kryeministrit të ri Bojko Borisov një informatë sekrete, të zhdukur nga Agjencia Shtetërore e Sigurisë Kombëtare. Aleksej Petrov është dyshuar se ka porositur konfliktin me sajtin “Të rrezikshmit”, ku burime anonime rrëfenin për dallaveret e pushtetit në etazhet e larta, përfshi dhe për ta, të lidhur me Aleksej Petrovin.

Në qoftë se e gjithë kjo vërtetohet lufta do të jetë e ashpër dhe flet për një vendosmëri dhe guxim të madh të qeverisë së re bullgare të Bojko Borisovit. Ndoshta më në fund dikush do të përpiqet ta pastrojë emrin e Bullgarisë si një shtet, ku politika, paratë dhe kriminaliteti janë lidhur ngushtë, në rast se nuk bëhet fjalë përsëri për hakmarrje të një qendre të korruptuar kundër një qendre tjetër të tillë, një film, të cilin e kemi parë jo një herë në të kaluarën.

Përgatiti në shqip: Vesella Mançeva

По публикацията работи: Maria Dimitrova

Последвайте ни и в Google News Showcase, за да научите най-важното от деня!

Ndaje

Operacioni “Oktapod” shthur rrjetin mafioz

Më shumë nga rubrika

Kundëradmirali Marcelo Tarapov: Bullgaria dhe Argjentina po zhvillojnë një aktivitet të frytshëm të përbashkët në Antarktidë

Bullgaria bëri ekzaminime parandaluese për bullgarët në fshatin shqiptar Pustec

Një shoqatë e re, një shpresë e re për njerëzit e rajonit të Gollobordës

Si do të ndikojë në BE rezultati i zgjedhjeve presidenciale në SHBA

Bullgarët e vetëshpallur në Maqedoninë e Veriut janë shumë më tepër se ata të regjistruar

Nënpresidentja Ilijana Jotova hapi një ekspozitë për Trakinë e lashtë në Muzeun Getty