A ka rrezik që modeli i krizës ekonomike në Greqi të përsëritet dhe në Bullgari

botuar më 10-03-15 12.30.MD

“Nuk duhet të lejojmë dobësim të disiplinës buxhetore dhe harxhime pa pasur para në buxhet.” – deklaroi analizatori ekonomik Georgi Angelov nga Instituti “Shoqëria e hapur”.

Foto: BGNES

Ekonomistë perëndimorë paralajmërojnë se recesioni në Evropë dhe kriza ekonomike në Greqi fshehin rreziqe dhe për ekonominë bullgare. “Këto do të jenë sfidat kryesore që Bullgaria do të përballojë në një plan afatshkurtër”, thuhet në një raport të edicionit britanik “Econimist”. Qeveria bullgare bllokoi një seri reformash të rëndësishme ekonomike, gjë që do të çojë në rimëkëmbje më të ngadaltë, megjithëse financat publike bullgare konsiderohen më stabile në Evropën Lindore dhe është pak e mundur që në Bullgari të ketë një krizë si ajo në Greqi, shkruan agjencia Reuters.

Analizatorët ekonomikë bullgarë dhe politikanët e djathtë paralajmërojnë se në qoftë se qeveria bullgare nuk ndërmerr masa urgjente dhe radikale antikrizë, në ekonominë bullgare do të shfaqet një valë e re e krizës. Mund të arrihet deri në një krizë financiare dhe vendi ynë të marrë rrugën e Greqisë. Duhet të ndërpritet presioni mbi shpenzimet e buxhetit, siç kërkojnë organizatat profesionale. Analizatorët ekonomikë nënvizojnë se deficiti i buxhetit po thellohet gjatë të dy muajve të parë të këtij viti dhe të ardhurat e shtetit po pakësohen. Analizat e ekspertëve tregojnë se të ardhurat vetëm nga tatimet indirekte gjatë muajit janar të këtij viti janë pakësuar me 500 milionë leva (250 milionë euro), kurse 40% të biznesit ka kaluar në sektorin ilegal.

Pozita e qeverisë: “Nuk do të ketë situata të tilla të rënda ekonomike dhe sociale siç në Greqi”, komentoi ministri i financave Simeon Djankov, duke shtuar se deri në mesin e dytë të vitit ekonomia jonë do të dalë nga kriza. Por deri atëherë, paralajmëroi ministri, të gjitha shpenzimet suplementare duhet të kompensohen me burime të reja të të ardhurash, ndryshe deficiti do të rritet dhe do të ndodhë kjo që ndodhi në Greqi.

Çfarë tregojnë të dhënat ekonomike për Bullgarinë: Bullgaria është në vendin e dytë për nga rritja industriale në BE dhe me treguesit më të mirë për sa i përket politikës fiskale, por është në vendin e fundit për nga prodhueshmëria e punës, tregon një raport i Business Europe, i cili do të prezantohet në Bruksel muajin mars të këtij viti. Sipas ekspertëve vendi ynë tregon një qëndrueshmëri të madhe gjatë krizës dhe është në një nivel me Francën dhe Hungarinë. Treguesi “barra tatimore” na jep pozitën e 10-të ndër 29 shtete në Evropë.

Një koment mbi temën posaçërisht për Radio Bullgarinë bëri analizatori ekonomik Georgi Angelov nga Instituti “Shoqëria e hapur”.

Çfarë masa janë të domosdoshme që të mos përsëritim skenarin grek?

“Nuk duhet të lejojmë dobësim të disiplinës buxhetore dhe harxhime pa pasur para në buxhet. Nuk duhet të shtyjmë reformat, sepse efektet pozitive të reformave do të ndikojnë në mjedisin e biznesit dhe në klimën e investimeve dhe kështu do të ndihmojnë rimëkëmbjen nga kriza.”

Cilat janë shkaqet për pakësimin e të ardhurave shtetërore?

“Ka disa shkaqe. Te sigurimet për shembull shkaku është se ka një papunësi më të madhe, domethënë më pak njerëz punojnë dhe më pak paguajnë. Te tatimi mbi fitimin ulja drastike i detyrohet faktit se të ardhurat e firmave janë pakësuar. Shkaku i tretë është se recesioni ndikon në import dhe në konsum dhe si pasojë ka një ndikim negativ në të ardhurat tatimore. Ekonomia hije gjithashtu ka ndikim, sepse stimulon fshehjen e të ardhurave. Këta stimuj do të ndikojnë dhe më shumë, në qoftë se qeveria rrit sigurimet shëndetësore dhe i ngarkon më shumë tatimpaguesit. Unë do të doja to shoh një program për pakësim gradual të barrës së tatimeve dhe sigurimeve, sepse kjo do të ndihmojë për hapjen e vendeve të reja të punës dhe për pakësimin e stimujve të fshihen të ardhura.”

Ku fshihen rreziqet në këtë situatë?

“Javët dhe muajt e fundit vërejmë një tendencë pozitive si në sektorin industrial, ashtu edhe në eksport. Por kjo rimëkëmbje mund të ndalet lehtësisht, në qoftë se qeveria ndërmerr rritje të shpenzimeve dhe të barrës së tatimeve dhe sigurimeve. Dhe në vend që të shfrytëzojmë përmirësimin e situatës në tërë BE, ne mund të ndalim rimëkëmbjen dhe të mbetemi një nga pak vendet, të cilat, bashkë me Greqinë, vazhdojnë të zhyten.”

Përgatiti në shqip: Ekaterina Tarpomanova

По публикацията работи: Tania Harizanova

Последвайте ни и в Google News Showcase, за да научите най-важното от деня!

Ndaje

A ka rrezik që modeli i krizës ekonomike në Greqi të përsëritet dhe në Bullgari

Më shumë nga rubrika

Konfederata e Punës “PODKREPA” kritikoi ashpër projektin për ndryshime në Kodin e Punës

Biznesi është i shqetësuar se kriza politike po pengon zhvillimin e vendit

“Lukoil” mohoi se është duke negociuar me një konsorcium për shitjen e rafinerisë në Burgas