Vazhdon shtrenjtimi i jetesës dhe varfërimi i bullgarëve

botuar më 11-08-02 10.59.PD

Shtrenjtimi i jetesës në Bullgari i detyrohet rritjes së çmimeve të ushqimeve.

Foto: BGNES

Vetëm për një vit jetesa në Bullgari është shtrenjtuar me pothuaj 7%. Këto të dhëna i shpalli Konfederata e Sindikatave të Pavarura në Bullgari. Sindikatat rikujtojnë se rrogat në sektorin shtetëror dhe pensionet janë ngrirë, në sektorin privat regjistrohet një rritje minimale e pagës dhe tendenca e pakësimit të punësisë vazhdon. Në këtë sfond gjithnjë e më shumë njerëz bien nën vijën e varfërisë. Ja përse gjatë vjeshtës Konfederata e Sindikatave të Pavarura në Bullgari do të këmbëngulë për ndryshim të politikës së të ardhurave.

Sipas Eurostat-it në vendet evropiane shtrenjtimi i jetesës i detyrohet kryesisht rritjes së çmimeve të transportit dhe të banesave. Në Bullgari situata është e ndryshme – shtrenjtimi i jetesës i detyrohet rritjes së çmimeve të mallrave më të rëndësishme, ushqimeve. Sipas Institutit Kombëtar të Statistikave janë shtrenjtuar vaji – me 32%, gjalpi i lopës – me 28%, sheqeri – me 50%, qumështi dhe kosi – me 12%, djathi – me 20%. Rritja e çmimeve të perimeve të stinës është me 30%. Inflacioni mesatar në Bullgari është 3,5%, ndërsa niveli i tij mesatar në Evropë është 3,1%. Për mbajtjen e një familjeje me katër pjesëtarë janë të nevojshëm 2113 leva (ose 1080 euro) në muaj. Pak janë familjet bullgare me të ardhura të tilla. Sipas statistikës kombëtare të ardhurat e familjeve gjatë tremujorit të parë të këtij viti në krahasim me tre muajt e parë të vitit 2010 shënojnë rritje me 2,1%. Sipas zotit Plamen Dimitrov, president i Konfederatës së Sindikatave të Pavarura në Bullgari, shtrenjtimi i jetesës do të vazhdojë dhe më tej.

“Mbajtja e jetesës në krahasim me qershorin e vitit të kaluar është rritur me 6,8%. Sipas nesh kjo është shqetësuese. Kam parasysh gjithçka që ndodh nga 1 korriku – dhe pikërisht shtrenjtimi i çmimeve të mallrave kryesore, i energjisë elektrike dhe ngrohjes, i benzinës dhe lëndëve djegëse. Këto fakte i pohojnë shqetësimet tona se po të ruhen këto tendenca dhe tempet e tyre, inflacioni deri në fund të vitit do të arrijë 8-9%. Kjo e tejkalon shumë prognozën e përfshirë në buxhetin e shtetit dhe do të pakësojë fuqinë blerëse të shumë qytetarëve bullgarë.”

Rroga mesatare në Bullgari gjatë tremujorit të parë të këtij viti sipas statistikës zyrtare është 671 leva (343 euro) dhe rritja e saj reale është 3,7%. Por shkaku kryesor për këtë rritje është pakësimi i numrit të të punësuarve, theksojnë sindikatat. Vetëm për një vit numri i të punësuarve është pakësuar me 47 mijë veta. Sipas sindikatave sot nën kufirin e varfërisë jetojnë 28% të bullgarëve. Ka sektorë të industrisë, ku vërehet një tendencë e qëndrueshme e rritjes së prodhimit, por kjo pothuaj nuk ka ndikim në rrogat e punës. Këto dega janë nxjerrja e qymyrgureve, prodhimi i pajisjeve elektrike, i letrës, i mjeteve të transportit etj.

“Kjo tendencë e rritjes së prodhimit nuk është lidhur me një rritje të rrogës së punës dhe të numrit të të punësuarve – vazhdon Plamen Dimitrovi. Shumë nga federatat tona sindikale do të kërkojnë bisedime për rritje të të ardhurave në këta sektorë të industrisë, në të cilët ka gjallërim. Kjo do të bëhet në bazën e argumenteve ekonomike.”

Nga Konfederata e Sindikatave të Pavarura në Bullgari do të këmbëngulin që rrogat në sektorin shtetëror të rriten me 10% vitin tjetër dhe kjo të përfshihet në buxhetin shtetëror për vitin 2012. Por madje të ketë rritje të rrogave, bullgarët prapë do të jenë në vendin e fundit për nga të ardhurat ndër evropianët e tjerë.

Përgatiti në shqip: Ekaterina Tarpomanova

По публикацията работи: Millka Dimitrova

Последвайте ни и в Google News Showcase, за да научите най-важното от деня!

Ndaje

Vazhdon shtrenjtimi i jetesës dhe varfërimi i bullgarëve

Më shumë nga rubrika

Sa kushtojnë zgjedhjet në Bullgari?

Nxënësit bullgarë fituan pesë medalje në një konkurs të astrofizikës në Brazil

Një ngjitje të dielën deri në shtëpinë malore "Aleko" na kthen në kujtimet e ngjitjes së parë të organizuar në majë

"Rregullat e lojës" të energjisë së gjelbër në planin e BE-së të Mario Draghit

11 universitete nga 9 shtete marrin pjesë në Konferencën “Bullgaria Piktoreske. Dialogët ndërdisiplinorë në shtëpi”

"Për" ose "kundër" celularëve - një çështje e hapur në shkollën bullgare