Bullgaria pret nënshkrimin e marrëveshjes me Katarin për furnizime të gazit të lëngëzuar që do të kontribuojë për diversifikimin e burimeve të gazit. “E diskutuam këtë temë dhe jemi të kënaqur nga rezultatet e bisedimeve me Katarin”, tha ministri i ekonomisë dhe energjetikës, Dragomir Stojnev para gazetës “Gulf Times”. Ai rikujtoi, se i vetmi furnizues i gazit për Bullgarinë është Rusia përmes Ukrainës. Nëse Katari investon në një terminal për gazin natyror në Gadishullin e Ballkanit, atëherë do të ketë një treg më të gjerë, sepse shumica prej vendeve ballkanike si Serbia, Maqedonia, Kosova dhe Shqipëria do të shfrytëzojnë gazin e Katarit, shtoi z. Stojnev.