Në fillim të kësaj jave jo vetëm në Kosovë u organizuan aktivitete festive kushtuar përvjetorit të 6-të nga Shpallja e Pavarësisë. Tradicionalisht më 17 shkurt Ambasada e Kosovës në Sofje jep mbrëmje solemne në hotelin “Sheraton” në qendër të kryeqytetit. Aty Ambasadori, Shkëlqesia e Tij z. Shpend Kallaba priti edhe miqtë bullgarë të cilët vazhdimisht kontribuojnë në forcimin e marrëdhënieve në mes të Bullgarisë dhe Kosovës.

Ambasada organizoi një mbrëmje shumë të këndshme, ku ndihej respekti i dy popujve për njëri-tjetrin. Ndër të pranishmit ishin Ambasadori i Shqipërisë në Sofje bashkë me familjen e tij, diplomatë bullgarë e të huaj, zyrtarë, artistë dhe gazetarë. Zoti Kallaba dhe stafi i tij gjetën kohë të komunikojnë me secilin nga më së 200 mysafirët e ftuar. Këta të fundit patën mundësinë të dëgjojnë himnet e dy shteteve, po ashtu të kënaqen me muzikën e Shefqet Hoxhës – Sheki. Ai ka lindur në Ferizaj. Mësimet e muzikës i ka mbledhur aty, në Prizren, Sarajevë, Londër, Madrid, Paris, Tiranë dhe në Sofje dhe i vazhdon edhe sot për t’i hapur globit vlerat shpirtërore shqiptare, e botërore, për çfarë është nderuar me çmime dhe njohe të panumërta.

Një nga formacionet bullgare me të cilat Sheki ka zhvilluar aktivitete të përbashkëta është Kori “Polifonia”. Dirigjentja e tij, znj. Lydmilla Gerova rrëfen se sa e mahnitur ka qenë nga vizita e saj e parë Kosovë ku “Polifonia” ka marrë pjesë në Festivalin e Gjakovës. “Fillimisht patëm paragjykime për Kosovën, sidomos për sa u përket rrugëve. Duke udhëtuar për në Gjakovë, rastisëm në një autostradë sikurse ishin në Evropën Qendrore – kujton dirigjentja e Korit “Polifonia”, znj. Lydmilla Gerova. – U vendosëm në një hotel të mrekullueshëm me kushte shumë të mira. Ushqimi ishte shumë i shijshëm. Na ofruan të gjitha gjellët tradicionale. Z. Sheki na priti me atasheun bullgar të kulturës z. Lydmill Mitov dhe të dy na shoqëruan në Prishtinë, ku vizituam pikat kulturore e historike, skulptura dhe ndërtesa të cilat ia vlejnë të shihen. Për kohën e shkurtër të vizitës aty ne morëm informacione të plota për shtetin e Kosovës. Gjë tjetër që na la mbresë ishin njerëzit, prej fytyrave të të cilëve buronte një qartësi, mirësi, një lloj gëzimi për këtë se ndërtojnë shtetin më të ri në Ballkan. Më bëri përshtypje jashtëzakonisht të madhe se fëmijët e Shkollës së Mesme të Muzikës në Gjakovë para se të hynin në të i hiqnin këpucët, hynin brenda sikurse hynin në një tempull. Aty mbizotëronte një atmosferë, pak e harruar nga ne bullgarët, pra e tempullit të artit. Në Gjakovë të gjithë ishin shumë të dashur, duke na siguruar kushtet më të mira për provat për Festivalin. Për sa i përket publikut, rrallëherë na ka ndodhur që të kemi një publik të tillë, me dinjitet të plotë për interpretimet. Vizita në Kosovë ishte një festim i vërtetë për ne.”