Në vitin 2011 në Sofje dy shoqet Svetlla dhe Galja themeluan Qendrën e Matematikës Zbavitëse. Në të fëmijët e moshës nga 4 deri në 12 vjeç mësojnë matematikën nëpërmjet lojërave, problemave tërheqëse matematikore, valles së numrave dhe teatrit. Themelueset e kësaj qendre kanë qenë bashkënxënëse në Gjimnazin e Matematikës në kryeqytet. Më pas Svetlla ka mbaruar studimet e magjistraturës në degën e matematikës në Gjermani, ndërsa Galja është diplomuar në degën e inxhinierisë së aviacionit.

Çfarë bëjnë dy vajzat në Qendrën e Matematikës Zbavitëse?

“Kur të na pëlqejë ndonjë problemë matematikore, ne fillojmë të mendojmë se si ta paraqitemi atë në mënyrë sa më të tërheqëse – rrëfen Galja. – Kërkojmë literatura të ndryshme, shpeshherë mbështetemi në librat rusë, si dhe në sajtet në internet. Pasi i kemi mbledhur të gjitha elementet, i veshim ato në formë zbavitëse. Fëmijët mësojnë matematikën pa u vënë re. Ndonjëherë përfundojnë: “Ne nuk zgjidhnim problema me numra. Vërtetë, paska qenë kjo matematikë?”

Svetlla dhe Galja ushqejnë kureshtjen e fëmijëve duke përgatitur problema çdo herë më të vështira. Në Qendrën e Matematikës Zbavitëse fëmijët mësohen të kenë durim dhe të jenë punëtorë, sepse matematika kërkon shumë këmbëngulje, sqaron Galja. Në qendrën nuk ka nota, vetëm problema të reja matematikore të cilat zgjidhen p.sh., duke u kërkuar thesari i piratëve ose duke u deshifruar ndonjë mesazh sekret.

Dy vajzat i janë përkushtuar kauzës sociale. Në qytetin Vraca ata kanë vizituar një jetimore. Për mendimin e Svetllës dhe Galjas materiali duhet t’ua paraqitet jetimëve në mënyrë sa më të lehtë, sepse atyre u mungojnë njohuritë bazë dhe nuk besojnë në vetvete. Në të ardhmen Qendra e Matematikës Zbavitëse do të bashkëpunojë edhe me jetimore të tjera në Bullgari.

Svetlla ëndërron për matematikë zbavitëse në minibus.

“Dua të udhëtojmë me një minibus ku të ndodhin gjëra zbavitëse dhe të surprizojmë fëmijët kudo dhe në çdo kohë. Kjo ide ka të bëjë me udhëtimin, pra me zbulimin e horizonteve të reja. Ëndërroj po ashtu t’i mësojmë fëmijët me të meta, si p.sh., të verbrit.”

Receta e suksesit, sipas dy vajzave, është çdo veprim ta bësh me zemër. Si pohojnë vetë ato: “Sfidat të cilat vijnë njëra pas tjetrës e bëjnë njeriun të jetë më i fortë dhe me kohën ai fiton besim sa më të madh në vetvete. Njeriu mësohet gjithë jetën dhe në qoftë se ai e do një gjë shumë, atëherë kurrë nuk dorëzohet dhe gjen variante të ndryshme për të plotësuar ëndrrat që ka.” Një sfidë e këtillë për Svetllën dhe Galjen ka qenë derisa t’i bindin prindërit në dobinë e Qendrës së Matematikës Zbavitëse.

Përgatiti në shqip: Anna Kapitanova

Fotografi: arkiv personal