Aleksandër Feodorov është doktorant në Institutin e Letërsisë pranë Akademisë Bullgare të Shkencave. Muajin korrik ai do të bëjë disa studime kërkimor-shkencore në Akademinë Ndërkombëtare të Filozofisë në Lihtenshtajn. Ai është njeri prej 48 bullgarëve gjithsej, kandidaturat e të cilëve u miratuan dhe u financuan për kualifikim, punë pedagogjike ose shkencore në Norvegji, Islandë dhe Lihtenshtajn. Mjetet lëshohen nga programi “Fondi i Bursave të Hapësirës Ekonomike Evropiane”. Qëllimi është të forcohet bashkëpunimi dhe shkëmbimi i përvojës në fushën e arsimit të lartë dhe punës kërkimor-shkencore midis Bullgarisë dhe vendeve të Hapësirës Ekonomike Evropiane – Norvegjisë, Islandës dhe Lihtenshtajnit. Ky program realizohet në periudhën nga viti 2013 deri në vitin 2016. Shuma e përgjithshme është më se 1.7 milion euro, prej tyre 1.5 milion euro sigurohen falas nga tri shtetet donatore, ndërsa paratë e tjera janë bashkëfinancim kombëtar. “Kjo është një mundësi e jashtëzakonshme, sepse ato tri shtete janë me standard tepër të lartë dhe pa financim të tillë shkencëtarët bullgarë nuk kanë shans as të shkojnë, as të punojnë atje”, është kategorik Aleksandri. Vet ai ka mbaruar letërsi në Holandë, por preferoi të kthehet në Bullgari, ku të vazhdojë karrierën shkencore. Programe të tilla i sigurojnë atij mundësinë e këmbimit afatshkurtër shkencor dhe vendosjen e kontakteve me kolegë jashtë shtetit.

“Unë po studioj pragmatizmin gjatë shekullit XIX dhe vendin e tij në letërsi. Pasi arsimi im i lartë është me orientim letrar, në Akademinë Ndërkombëtare të Filozofisë do të studioj pikërisht anën filozofike të këtij problemi. Do të kem mundësi të punojë me shumë shkencëtarë të huaj” – rrëfen shpresat e tij Aleksandri.

Përveç studentëve dhe doktorantëve nga programi mund të përfitojnë edhe profesorë, studiues, nëpunës administrativë të universiteteve bullgare dhe të organizatave shkencore. Marija Endreva është pedagoge e letërsisë dhe historisë kulturore të vendeve gjermanisht-folëse në Universitetin e Sofjes. Në vazhdim të tri javëve ajo do të bëjë studime shkencore në Lihtenshtajn. Lidhur me këtë ajo shpjegon: “Qëllimi është të studiojmë historinë dhe zhvillimin kulturor të këtij vendi të vogël gjermanisht-folës dhe pas kësaj të përfshijmë dituritë e grumbulluara në leksionet. Tani për tani përqendrojmë vëmendjen mbi shtetet e mëdha, ku flitet gjermanishtja si Gjermania dhe Austria, përderisa Zvicra, Lihtenshtajni dhe Luksemburgu sikur mbeten anas. Kështu që kjo është një mundësi e mrekullueshme të larmojmë përmbajtjen mësimore të leksioneve. Kur njeriu mban leksione i kushtuara ndonjë shteti, është me rëndësi të madhe përvoja e tij personale. Një njohuri, grumbulluar vetëm nga librat, nuk mjafton për punën pedagogjike.”

Irina Ivanova është një nga nëpunëset administrative, të cilët do të përfitojnë nga mundësitë për zhvillim profesional. Ajo është inspektore në Degën Ndërkombëtare të Universitetit të Arkitekturës, Ndërtimit dhe Gjeodezisë dhe merret me programet evropiane të lëvizshmërisë “Erasmus”, “CEEPUS” dhe përgjigjet për marrëdhëniet me universitetet e huaja. Irina Ivanova do të marrë pjesë në një kurs pesëditor mësimor në Universitetin islandez të Reikjavikut. Ajo thotë, se: “Jam me shpresë, se ky kurs do të më ndihmojë në zhvillimin tim profesional. Do të kem mundësi të njihem me kolegë nga universitete të tjera, me të cilët do të shkëmbejmë ide për punën me studentët dhe për mënyrat e përhapjes së programeve evropiane ndër ta. Po nisem me shpresa të mëdha.”

Përgatiti në shqip: Svetllana Dimitrova