Më 29 tetor në Bukuresht u zhvillua edicioni i nëntë i Forumit për agro-tregti dhe bashkëpunim ekonomik midis Kinës dhe vendeve nga Evropa Qendrore dhe Lindore. Atje lindi lajmi se Bullgaria do të jetë qendra regjionale e këtij bashkëpunimi në fushën e bujqësisë. U mor vendimi që në Sofje të krijohet një Asociacion për inkurajimin e bashkëpunimit në fushën e bujqësisë mes Kinës dhe vendeve nga Evropa Qendrore dhe Lindore. Kjo ide u përhap nga vendi ynë para një viti në kuadrin e takimeve të mëparshme në këtë format 16+1.

Sipas fjalëve të Kryeministrit kinez Li Këcjan, “perandoria nënqiellore” ka në plan që gjatë 5 viteve në vazhdim të dyfishojë këmbimin tregtar me vendet nga Evropa Qendrore dhe Lindore dhe të rritë konsiderueshëm investimet e saj. Shteti kinez ka zbuluar një vijë krediti për Evropën Qendrore dhe Lindore me përmasë 10 mlrd dollarë amerikanë. Interesat për investime janë kryesisht në sferën e transportit – krijimi i vijave moderne hekurudhore, i aeroporteve, rrugëve, si dhe ndërtimi i centraleve elektrike, përfshi këtu dhe centralet bërthamore. Që prej shumë kohe Kina ka deklaruar dëshirën e saj për të rimëkëmbur Ekspresin Mitik të Orientit, këtë herë nëpërmjet trenave shumë të shpejtë nga Pekini deri në Paris.

Kina gjithnjë e më shpesh e kthen shikimin e saj drejt BE-së lidhur me importin e ushqimeve me cilësi të lartë, si dhe për mallra bujqësore. Në këtë drejtim Bullgaria, bashkë me traditat e mira në bujqësi ka se çfarë të ofrojë. “Për ne, si një vend bujqësor, është me rëndësi që ne të jemi lokomotiva e marrëdhënieve midis Kinës dhe Evropës Qendrore dhe Lindore”, deklaroi Ministri i Bujqësisë Vasil Grudev gjatë nënshkrimit të marrëveshjes për krijimin te ne të Asociacionit për Inkurajimin e Bashkëpunimit në Bujqësi midis Kinës dhe Evropës Qendrore dhe Lindore. Sipas zotit Grudev, ky është hapi i parë për institucionalizimin e bashkëpunimit midis vendeve nga formati 16+1 në fushën e bujqësisë dhe ushqimeve. Asociacioni do të gjendet në Ministrinë Bullgare të Bujqësisë dhe Ushqimeve.

Ka shumë kohë që Bullgaria është e njohur në tregun kinez për kosin e saj, i cili prodhohet në vend sipas licencës bullgare. Një përparim i madh ishte shënuar gjatë disa viteve të fundit edhe sa u përket verërave bullgare. Sipas fjalëve të drejtorit ekzekutiv të Agjencisë së Vreshtarisë dhe Verës Krasimir Koev, gjatë vitit 2013 vera e eksportuar për Kinën ka qenë afro 1.5 mln litra, kurse vetëm për gjysmëvitin e 2014-ës eksporti ka arritur tashmë 2 mln litra. Pritjet e tij janë që deri në fund të vitit eksporti ynë të arrijë 4 mln litra, domethënë një rritje mbi dy herë.

Përveç kosit dhe verës, mallra të kërkuara bullgare në Kinë janë gjithashtu vaji i trëndafilit, mjalti dhe produktet e mjaltit, mishi i përpunuar, frutat dhe perimet, ushqimet për kafshët. Një bashkëpunim i mirë midis dy vendeve mund të zhvillohet gjithashtu në fushën e inxhinierisë bujqësore dhe të shkencave agrare. Ndër partnerët e Bullgarisë jashtë BE-së, Kina zë tashmë vendin e dytë pas Turqisë si një destinacion për eksportin bullgar.

Përgatiti në shqip: Vesella Mançeva