Beteja për shpëtimin e çdo një zemre fëmijërore – fjalë për fjalë dhe të thënë në mënyrë të figurshme – është në fokusin e nismës së sivjetshme bamirëse “Krishtlindjet Bullgare – i dhuro shpresë fëmijës në rrezik”. Dhurimet e mijëra bullgarëve do t’i ndihmojnë fëmijët me sëmundje kongjenitale, kryesisht të zemrës, me diagnostikim të hershëm dhe me mjekim modern.

Fillimi zyrtar i fushatës 2014/2015 nën kujdesin e presidentit Rosen Plevneliev ishte shpallur në Spitalin Kardiologjik Kombëtar – një nga spitalet të të cilave ajo u ndihmon. Me parat që do të mblidhen në kuadrin e edicionit të 12-të të “Krishtlindjeve Bullgare” teknika e vjetër e spitalit mund të zëvendësohet me aparaturë të teknologjisë së lartë, tha kreu i shtetit dhe vazhdoi:

“Kuptimi i vuajtjeve dhe përpjekjet që t’i pakësojmë këto vuajtje na bëjnë më të fortë, më të mirë dhe qytetarë më të vlefshëm. Veprat e mira e bëjnë jetën sa më të vlefshme dhe kuptimplotë. “Krishtlindjet Bullgare” përkrahin bamirësinë dhe vullnetarizmin. Fushata gjithmonë arrin rezultate të dukshme dhe për këtë arsye shumë bullgarë e përkrahin duke ndihmuar për realizimin e qëllimeve fisnike.”

Në Bullgari çdo vit linden 3 500 fëmijë me anomali kongjenitale, prej të cilave mes 600 dhe 700 janë me probleme kardiologjike. Ndër këta fëmijë është Diljana Atanasova, e cila tashmë është 23 vjeçare. Ajo ka sëmundje kongjenitale të zemrës dhe 2 operacione kardiologjike, të bëra në Klinikën Kardoiologjike të Fëmijëve. Operacioni i parë i saj është bërë kur ajo ka qenë bebe. I dyti – para dy vjetëve, pavarësisht moshës së saj (në Bullgari nuk kemi spitale për pacientë të rritur me sëmundje kongjenitale të zemrës).

“Mjekimi i pacientëve të tillë nuk është financuar nga Arka e Sigurimeve Shëndetësore dhe kjo krijon shumë vështirësi. Për ne kjo klinikë është familja e dytë, sepse është e vetmja në Bullgari që na jep shans për jetë – shpjegoi me lot në sy Diljana. –Gjendja ime nuk është vetëm një diagnozë, por është fati im, të cilin e kanë shumë fëmijë. Ne besojmë se ne të gjithët do ta fitojmë betejën – betejën për zemrat tona!”

Pacientët e vegjël i dhuruan presidentit një suvenir në formën e zemrës me mbishkrim të shkruar nga Diljana.

“Vetëm njeriu, i cili e ka përjetuar dhimbjen e vërtetë mund të mësohet se si të jetojë. Sot tashmë di sa e vështirë është që të marrësh frymë, të ngjitësh shkallët, të buzëqeshësh, të jesh i mirë”, tha presidenti Plevneliev.

Vitin e kaluar edicioni i radhës i “Krishtlindjeve Bullgare” u ishte kushtuar fëmijëve me probleme në të parin dhe në të dëgjuarin. Ai mblodhi dhurime për më se 1 mln euro. 524 ishin fëmijët, të cilët i përdorën këto mjete financiare. Shifra e tyre ishte rekorde për këtë nismë. 30 spitale në tërë Bullgari morën pajisje për më se gjysmë milion euro. Sivjet mund ta tejkalojmë rekordin e vitit të kaluar dhe t’i shpëtojmë zemrat e fëmijëve. Ata e meritojnë këtë!

Përgatiti në shqip: Jordanka Ivanova