Në afërsi të qytetit të Danubit Svishtov (Bullgari Veriore), të njohur me arkitekturën e tij të bukur, turistët mund të zhyten në atmosferën e së kaluarës. Këto territore janë populluar që në zanafillën e njerëzimit. Së ishin qenë vendbanimet e trakëve të lashtë dhe 45 vjet pas erës së re romakët kanë ngritur një kamp të madh legjionar. Në të janë vendosur familjet e veteranëve të luftërave, ato të tregtarëve dhe zejtarëve. Sot duken mbeturinat e fortesave, të vendbanimeve dhe ndërtesave administrative. Po ashtu turistët vijnë këtu për të parë mbeturinat e rrugëve të dikurshme, të termave rome dhe të një kompleksi që ka të bëjë me periudhën e hershme të krishterimit. Qyteti Nove supozohet të jetë njëra nga qendrat kryesore të krishterimit të hershëm që daton prej shekujve IV e V-të. Në atë kohë Noveja ka qenë kryeqytet i perandorit Teodoriku i Madh. Liturgjitë e para në gjuhën e gotëve i ka kryer peshkopi Vulfila. Para pak kohësh qyteti antik u restaurua sipas projektit “Noveja – zemra e legjionit” të programit operativ “Zhvillimi rajonal”.

Më shumë rreth objektit arkeologjik mësojmë nga Zv.kryetari i Bashkisë së Svishtovit, z. Pllamen Aleksandrov:

“Dikur qyteti antik ka qenë shtabi i legjionit të parë italian, e ashtuquajtura “principi”. Pranë tij gjendej kompleksi i peshkopëve, i cili daton nga shekujt IV-V-të. Në qytetin e lashtë ka pasur dy bazilika – një e vogël dhe një e madhe, si dhe një pagëzore. Besohet se aty janë pagëzuar fiset e gotëve të cilat janë vendosur në rajon. Përveç mbeturinave dhe artefakteve në qytetin antik Nove, turistët mund të marrin pjesë në ngjarje të cilat u ngjajnë atyre të së kaluarës.”

Çdo pranverë Noveja kthehet në një arenë të gladiatorëve, legjionarëve dhe barbarëve, pra këto janë ngjarjet që simulohen për t’u kujtuar koha e lashtë. Këto ngjarje zhvillohen për shkak të festivalit të njohur kushtuar trashëgimisë së lashtë “Shqiponja e Danubit”. Në këtë të fundit marrin pjesë si grupe nga Bullgaria, ashtu dhe grupe të huaja nga Italia, Rumania dhe Polonia.

“Grupet vendase tregohen ambicioze në organizimin e ngjarjeve të tilla– vë në dukje z. Aleksandrov. – Për këtë qëllim ne bashkëpunojmë me operatorë të ndryshëm turistikë. Çdo vit festivali vizitohet nga më se 6 mijë të huaj. Një pjesë prej tyre vjen posaçërisht për të parë spektaklin e operës i cili spektakël jepet në ditën e dytë të festivalit dhe gjithmonë ka të bëjë me ndonjë tematikë të lashtë.”

Përgatiti në shqip: Anna Kapitanova