Dje Këshilli i Evropës për Drejtësi dhe Çështje të Brendshme arriti marrëveshje “me shumicë të madhe” për ndarjen në dy faza të 120 mijë migrantëve, duke kapërcyer mosmarrëveshjet për kuotat e ofruara nga Brukseli. Pas debateve të rënda 4 shtete votuan kundër – këto janë Çekia, Sllovakia, Rumania, Hungaria. Finlanda abstenoi. Bullgaria duhet të pranojë 852 refugjatë, të cilët do të vijnë nga Greqia dhe Italia. Kështu numri i përbashkët i njerëzve të pranuar tek ne nga korriku deri tani do të bëhet 1352 veta.

“Ky angazhim duhet të jetë i detyrueshëm për shtetet anëtare sepse ndryshe aplikimi i tij do të bëhet i pakuptimtë. Në të njëjtën kohë dimë se ky është një vendim i përkohshëm dhe duhet të kërkohen vendime parimore për kapërcimin e situatës së krizës” – tha zëvendëskryeministrja Rumjana Bëçvarova, e cila s’ka kundërshtime në lidhje me kuotën bullgare.

Sipas drejtorit të Institutit për Ekonomi dhe Marrëdhënie Ndërkombëtare Ljubomir Kjuçukov masat, të cilat Evropa po i ndërmerr janë urgjente, por të vonuara.

“Të gjitha masat e deritanishme – edhe operacionet në Mesdhe, edhe konfiskimi i anijeve të trafikantëve, edhe kuotat, bile edhe ndërtimi i mureve në shikim të parë duken logjike, por kanë një të metë të përbashkët – nuk i zgjidhin problemet. Dhe problemet kryesore janë dy – lufta në Lindjen e Mesme dhe globalizimi i pabarazisë. Varfëria në Afrikë tashmë është problem për Evropë sepse provokon migracion ekonomik. Nga kjo pikëpamje mund të them se në interes të Bullgarisë është kërkimi i një vendimi solidar mbarevropian. Shteti ynë nga pozita e tij e kufirit të jashtëm të BE-së në të gjitha rrethanat duhet të kërkojë një zgjidhje të tillë. Vetëm në Turqi po ndodhen dy milionë migrantë nga Siria. Ata lehtësisht mund të ndryshojnë itinerarin e tyre dhe atëherë situata në Bullgari do të bëhet e tillë, siç aktualisht është ajo në Greqi, Hungari dhe Itali. Më e rëndësishmja tani është që të hiqen premisat për migrimin e njerëzve. Sipas meje kjo do të thotë kërkim i një vendimi politik për përfundimin e luftës civile në Siri e kjo nuk mund të bëhet ndërmjet mjeteve luftarake. Evropa, bashkë me të gjithë faktorët ndërkombëtarë, përfshi Kinën dhe Rusinë mbi bazën e drejtësisë ndërkombëtare dhe me vendim të Këshillit të Sigurisë pranë OKB-së duhet të kërkojë zgjidhjen e problemit me Shtetin Islamik. Ndryshe nga të gjitha konfliktet dhe luftërat, në të cilat më në fund arrihet një vendim politik, në rastin me Shtetin Islamik ky vendim është i pamundshëm.”

“Në rajonin tonë kemi përjetuar shumë kriza refugjatësh, por tani jemi dëshmitarë të një fluksi shumë të madh njerëzish që kanë një qëllim të qartë – shtetet, në të cilat jetohet mirë” – komenton situatën profesori Dinko Dinkov nga katedra “Marrëdhënie Ndërkombëtare” e Universitetit Ekonomik të Sofjes.

“Aktualisht në Evropë janë shumë të fuqishme egoizmat kombëtare dhe përmasat e tyre janë më të mëdha sesa egoizmi i shquar ballkanik. BE-ja përpiqet të shpërndajë fluksin e klandestinëve në mënyrë të centralizuar, por nuk arriti të përpunonte një politikë të jashtme efektive për siguri dhe për mbrojtje pikërisht për shkak të këtyre egoizmave. Tani Evropa është shumë e paqëndrueshme dhe kjo është e rrezikshme edhe për rajonin tonë. Shtetet ballkanike gjithashtu nuk kanë një pozitë të përbashkët, jo të gjitha prej tyre janë anëtare të BE-së. Përveç kësaj nën pyetje është vënë një nga arritjet e mëdha të BE-së – Hapësira e Shengenit. Mendoj se ata, të cilët duhet t’i marrin vendimet politike nuk kanë kapacitet për këtë. Në rast të aq shumë kundërvënieve dhe mosmarrëveshjeve veprimet e përbashkëta arrihen gjithnjë e më vështirë. Pikërisht tani – kur pozita e përbashkët është aq e domosdoshme.”

Përgatiti në shqip: Jordanka Ivanova