Me një ceremoni zyrtare para tempullit “Shën Aleksandër Nevski” në Sofje filloi vizita dyditore zyrtare e Kryeministrit të Federatës Ruse Dmitri Medvedev në Bullgari. Sot mysafiri do të ketë takime me Kryeministrin Bojko Borisov dhe Presidentin Rumen Radev. Tema kryesore e vizitës do të jetë bashkëpunimi në ekonomi, tregti, investime, shkencë dhe teknikë, kulturë dhe marrëdhëniet humanitare. Medvedev është për herë të dytë në Bullgari që nga viti 2008 e këtej, kur mori pjesë në një delegacion të kryesuar nga Presidenti Vladimir Putin. Gjatë disa viteve të fundit kishte faktorë të brendshëm dhe të jashtëm, të cilët penguan realizimin e projekteve të përbashkëta kyçe në energjetikë, si naftësjellësi Burgas – Aleksandrupolis, “Rryma Jugore” dhe centrali atomik “Belene”. Mirëpo, kohët e fundit vëzhgohet një etapë e re e zhvillimit të tyre. Bullgaria përsëri filloi të punojë mbi projektin e centralit atomik “Belene”, ndërsa Federata Ruse bëri të ditur se do të ndërtojë një devijim të gazsjellësit “Rryma Turke” përmes Bullgarisë.