Ministrja e punëve të jashtme e Bullgarisë Ekaterina Zaharieva e cilësoi deklaratën e homologut të saj turk Mevljut Çavushoglu (Mevlüt Çavuşoğlu) për Ligjin për bashkësitë fetare në Bullgari si fare e papranueshme për marrëdhëniet e miqësisë. Ajo tha se ka zhvilluar një bisedë telefonike me Çavushoglu me kërkesë të tij dhe në këtë bisedë ai ka shprehur shqetësimin e vet se Ligji për bashkësitë fetare është kundër fesë myslimane. Zaharieva e ka hedhur poshtë këtë pohim duke thënë se në ligjin në fjalë nuk ka tekste kundër asnjë feje dhe se Parlamenti bullgar e ka të drejtën të kujdeset për financimin e të gjitha bashkësive fetare tek ne, në mënyrë që ato të ndiejnë se janë të barabarta me njëra-tjetrën. Në Ministrinë e Punëve të Jashtme është ftuar për bisedime ambasadori turk në Sofje, shtoi Zaharieva dhe nënvizoi se Bullgaria kurrë nuk është dorëzuar para presionit.

Para ambasadorit Hasan Ulusoj (Hasan Ulusoy) u vu në dukje, se prioritet i politikës së jashtme bullgare është të mirëmbajë dialogun me vendet fqinje në respektim reciprok dhe mosndërhyrje në punët e brendshme. Zoti Ulusoj shpjegoi, se fjalët e ministrit Çavushogllu janë nxjerrë jashtë kontekstit dhe paraqiten në mënyrë të gabuar. Diplomati siguroi Ministrinë Bullgare të Punëve të Jashtme, se pala turke nuk ka pasur ndërmend të ofendojë Bullgarinë ose të ushtrojë ndikim mbi procesin legjislativ.