Në ishullin Shën Anastasia filloi një fushatë e madhe ekologjike. Ishujt afër bregdetit tonë pranë Detit të Zi janë pak për nga numri dhe janë me një sipërfaqe jo shumë të madhe. Ndoshta pikërisht për këtë shkak ata parapëlqehen nga turistët, ekologët, sportistët dhe njerëzit e artit. Atje janë xhiruar jo pak filma bullgarë me piratë të guximshëm, luftëtarë për liri dhe aventurierë.

Ishulli Shën Anastasia ka një histori të vrullshme, ndërsa sot është i njohur si vendi më romantik në Gjirin e Burgasit, ku mund të shihet i vetmi manastir ishullor i ruajtur në Bullgari. Në vigjilje të stinës verore turistike në rendin e ditës është ruajtja e mjedisit. Nga 1 qershori Bashkia e Burgasit fillon një fushatë për kufizimin e përdorimit të sendeve prej plastmase për përdorim të njëfishtë. Do të ketë konsum, por vetëm me sende prej qelqi, metali dhe letre. Meqenëse fillimi i fushatës është në Ditën e Fëmijës, në ishull do të organizohet një festë, e cila do të vazhdojë tërë ditën. Palombarët nga klubi “Miq të detit” – Burgas, do të pastrojnë fundin e detit rreth ishullit. Të gjithë së bashku do të shijojnë koncerte, shou-programe, degustime. Posaçërisht për fëmijët janë parashikuar aktivitete më të ndryshme.