Gjermania është optimiste se bullgarja Kristalina Gjeorgjieva do të bëhet kryetarja tjetër e Fondit Monetar Ndërkombëtar. Në Berlin nuk presin se mosha e Kristalina Gjeorgjievës mund të jetë problem që të mund të qëndrojë në krye të Fondit Monetar Ndërkombëtar, deklaroi zëdhënësi i Ministrisë gjermane të Financave, i cituar  nga agjencia “Reuters”. Deklarata erdhi pasi gjatë ditës së premte vendet e Bashkimit Evropian e zgjodhën Gjeorgjievën (65 vjeçe) për kandidate të BE-së  dhe për menaxhere të Fondit. Pjesa më e madhe e shteteve anëtare nga Bashkimi Evropian e përkrahën Gjeorgjievën, pavarësisht se kandidatura e saj do të imponojë ndryshime në rregullat e Fondit Monetar Ndërkombëtar, të cilat kërkojnë që udhëheqësi i institucionit të jetë nën 65 vjeç kur e merr përsipër këtë post kaq të rëndësishëm.