Një vendim i shpejtë për çështjet e hapura ndërmjet Bullgarisë dhe Maqedonisë së Veriut është i mundshëm, deklaroi Kryeministri maqedonas Zoran Zaev në lidhje me takimin e zhvilluar konsultativ të thirrur nga Presidenti bullgar Rumen Radev.

Sa i përket pozitës së Sofjes, se mbështetja e saj për të ardhmen evropiane të Shkupit nuk është pa kushte dhe se Bullgaria insiston për plotësimin e kushteve të parashikuara në Traktatin e Miqësisë dhe Fqinjësisë së Mirë, Zaevi komentoi se s’ka arsye për shqetësim:

“Ne i marrim paralajmërimet dhe mesazhet nga Sofja. Bullgaria është një nga përkrahësit tanë më të mëdhenj në BE dhe besoj se ajo do ta pohojë këtë duke ndihmuar fillimin e negociatave të BE-së me Maqedoninë e Veriut – diçka që vendi ynë e pres që prej 15 vjetëve, që kur është kandidate për anëtarësim”.