Me 170 vota pro, 36 kundër dhe 21 abstenime, parlamenti miratoi dhënien e dritës jeshile për fillimin e negociatave midis Maqedonisë së Veriut dhe BE-së. Dokumenti vendos si kushte:

-Zbatimi efektiv i Marrëveshjes së Miqësisë, Fqinjësisë së Mirë dhe Bashkëpunimit nga viti 2017;

- Garantimi i të drejtave të bullgarëve në Maqedoninë e Veriut, duke përfshirë edhe përfshirjen e tyre, në baza të barabarta me popujt e tjerë, në Kushtetutën e Maqedonisë;

- Përmirësimi i projekteve të Kornizës Negociuese dhe Konkluzioneve të Këshillit për të bërë më të qartë se asgjë në procesin e anëtarësimit të Shkupit në BE nuk mund të interpretohet si njohje e ekzistencës së “gjuhës maqedonase” nga Bullgaria;

- Garanci se fqinjësia e mirë mbetet një kriter horizontal gjatë gjithë procesit të anëtarësimit të Maqedonisë së Veriut në BE.

Partia “Vëzrazhdane” kërkoi shtyrjen e debateve si dhe marrjen e vendimit me shumicë të cilësuar prej 2/3, por salla e hodhi poshtë propozimin. “Vëzrazhdane” e cilësoi propozimin e presidencës franceze si një tradhti. Përfaqësuesit e të gjitha grupeve parlamentare përdorën gjerësisht argumentet historike në debate.

Toshko Jordanov nga “Ka një popull të tillë” e cilësoi vendimin si e miratuar nën presion. “Dje Macron deklaroi drejtpërdrejt, e citoj atë: “Ushtruam shumë presion mbi Bullgarinë muajt e fundit”.

“Ne nuk mund të presim “vetëm dashuri” nga Maqedonia. Duhet të mendojmë realisht, jo romantikisht. Është e vërtetë që Maqedonia është pjesa më romantike e historisë sonë, por është pikërisht romantizmi ai që na solli deri në atë pikë ku nuk mund të flasim të njëjtën gjuhë me vëllezërit tanë sot, edhe pse flasim të njëjtën gjuhë”, tha Toma Bikov nga GERB.