Në një seancë dëgjimore në Nënkomisionin për Sigurinë dhe Mbrojtjen në Parlamentin Evropian, kryetari i Komitetit Ushtarak të BE-së, Gjen. Robert Briger, nuk përjashtoi përfshirjen e vendeve të tjera evropiane në luftën në Ukrainë. Pyetjes së eurodeputetes bullgare Elena Jonçeva se cila është mundësia që vendet baltike, Polonia, Bullgaria dhe Rumania të përfshihen në konflikt, ai iu përgjigj se sa më e bashkuar është BE-ja për mbrojtjen e Ukrainës, aq më të mëdha janë shanset që lufta të ketë një rezultat të pranueshëm për Kievin dhe BE-në.

Udhëheqja ushtarako-politike ruse po diskuton mundësinë e nisjes së një sulmi bërthamor në Ukrainë, tha Aleksej Arestoviç, këshilltar i presidentit ukrainas Volodimir Zelenski. "Unë shoh disa dokumente ruse... Atje ata po diskutojnë një sulm bërthamor dhe të gjithë e kanë të qartë se kjo është çmenduri dhe nuk duhet ta lejojnë në asnjë rrethanë," tha Arestoviç, cituar nga UNIAN.

Këshilltari i presidentit amerikan për sigurinë kombëtare, Jake Sullivan, tha se mbështetja e SHBA për Ukrainën do të vazhdojë për aq kohë sa të jetë e nevojshme. Në një konferencë në Shtëpinë e Bardhë, ai theksoi se "Shtetet e Bashkuara po punojnë me Ukrainën për një strategji për ta ndihmuar atë si gjatë luftës për të rimarrë territorin e saj, ashtu edhe në negociatat me Rusinë".