Në një fjalim televiziv, udhëheqësi rus Vlladimir Putin mbështeti vendimin “spontan” të separatistëve në territoret e pushtuara ukrainase për të mbajtur referendume për bashkimin me Rusinë. Putin shpalli një mobilizim të pjesshëm ushtarak prej 300 000 rezervistësh për luftën në Ukrainë dhe kërcënoi se Rusia është gati të shfrytëzojë armë bërthamore në luftë. Kremlini njoftoi gjithashtu një mobilizim për kompleksin industrial ushtarak rus.

Shefi i NATO-s Jens Stoltenberg shkroi në Twitter: “Referendumet e rreme nuk kanë legjitimitet dhe nuk ndryshojnë natyrën e luftës agresive të Rusisë kundër Ukrainës”.

Diplomati i parë i BE-së, Josep Borrell, tha se Brukseli nuk do t’i njohë rezultatet e referendumeve. Këshilltari i Sigurisë Kombëtare i SHBA-së, Jake Sullivan tha se Uashingtoni i kundërshton pa mëdyshje këto referendume.

Presidenti francez Emmanuel Macron akuzoi Rusinë për imperializëm. Ai i përshkroi planet për votime në territoret ku po zhvillohet lufta si një “parodi”.

Kancelari gjerman Olaf Scholz komentoi se “ambiciet perandorake” të Presidentit rus Vlladimir Putin mund të çojnë në kolapsin e Ukrainës dhe Rusisë nëse Putin nuk pranon se nuk mund ta fitojë luftën.