2022 është një vit i veçantë për marrëdhëniet bullgaro-armene. Vendi ynë njohu pavarësinë e Armenisë më 23 dhjetor 1991 dhe marrëdhëniet diplomatike u vendosën më 18 janar 1992. Gjatë viteve u nënshkruan dhjetëra marrëveshje dhe memorandume në të gjitha sferat, ndërsa komisioni ndërqeveritar bullgaro-armen për tregti-ekonomi dhe bashkëpunimin shkencor-teknik luan një rol të konsiderueshëm për aktivizimin e marrëdhënieve mes dy vendeve.

“Dy vendet tona po ecin përpara me një vendosmëri për të ruajtur afërsinë. Gjatë 30 viteve të fundit, ata kanë krijuar një mekanizëm pune për bashkëpunim dhe ne po punojmë pa u lodhur për të forcuar më tej partneritetin tonë”, vuri në dukje Ambasadori i Jashtëzakonshëm dhe Fuqiplotë i Republikës së Armenisë në Bullgari, Shkëlqesia e Tij Armen Edigarian, gjatë hapjes së ekspozitës "Kujtesa" në Sofje.

Armenët janë pakica e katërt më e madhe në Bullgari. Sipas të dhënave nga regjistrimi i popullsisë në vitin 2011, ata janë 5235, dhe sipas të dhënave jozyrtare të siguruara nga Ambasada e Republikës së Armenisë në Sofje, ata numërojnë rreth 30 mijë persona (përfshirë shtetasit e Armenisë).

“Komuniteti armen në Bullgari ruan rolin e tij specifik si urë lidhëse midis dy vendeve tona. Kujtesa historike është me rëndësi të madhe dhe përcakton natyrën dhe forcën e marrëdhënieve tona. Dy popujt tanë ndajnë vlerat evropiane, afërsinë kulturore dhe respektin dhe mirëkuptimin e thellë të ndërsjellë”, theksoi Armen Edigarian.

Lidhjet kulturore midis dy popujve tanë janë të një rëndësie të madhe. Në fillim të tetorit, ambasadori Armen Edigarian hapi ekspozitën "Kujtesa", kushtuar 100 vjetorit të zhvendosjes masive të refugjatëve armenë në Bullgari dhe 30 vjetorit të vendosjes së marrëdhënieve diplomatike midis dy vendeve.

• Ekspozita "Kujtesa" tregon relikte të refugjatëve armenë në Bullgari 

"Këto janë raste të mrekullueshme për të menduar mbi forcën dhe tërheqjen kulturore të kombit armen dhe për të vlerësuar marrëdhëniet tona me Bullgarinë dhe popullin vëlla bullgar," vuri në dukje diplomati.

Sipas të dhënave të Institutit Kombëtar të Statistikave për vitin 2021, tregtia me Armeninë arriti në 42 556 milionë dollarë. Vajrat e naftës, detergjentët, ilaçet, traktorët zënë përqindjen më të madhe të eksporteve. Vendi ynë importon kryesisht pije alkoolike, verëra, qeramikë, lëndë druri nga Armenia. Interesi i sipërmarrësve bullgarë për Armeninë është në rritje, dhe investimet direkte armene në Bullgari për vitin 2021 janë 15.4 milionë euro.

Rëndësi të madhe për stimulin e partneritetit ka zgjerimi i ndërlidhjes së transportit në rajonin e Detit të Zi dhe Kaukazit. Megjithatë, regjimi i vizave dhe mungesa e një lidhjeje direkte me avion mes Sofjes dhe Jerevanit vështirësojnë lidhjet dypalëshe turistike. Fluturimet mes dy kryeqyteteve u diskutuan që në vitin 2020, por ende nuk janë bërë realitet.

Për sa i përket përshkallëzimit të tensionit prej dekadash përgjatë kufirit me Armeninë, ambasadori Armen Edigarian deklaroi kategorikisht:

"Forcimi i shtetësisë së pavarur, sovranitetit dhe demokracisë, vendosja e paqes dhe stabilitetit të drejtë në rajon mbeten prioriteti numër një i qeverisë armene, pavarësisht shumë sfidave, duke përfshirë agresionin e vazhdueshëm të Azerbajxhanit kundër territorit sovran të Armenisë."

Ambasadori Edigarian u bëri edhe një urim bullgarëve dhe armenëve:

“Na uroj të gjithëve për këtë përvjetor të rëndësishëm dhe urimet më të mira për përparim dhe sukses për bullgarët dhe armenët. Rroftë miqësia e përjetshme midis Armenisë dhe Bullgarisë!”.

Tërë përshëndetjen solemne të ambasadorit të Republikës së Armenisë, Armen Edigarian, mund ta dëgjoni në faqen e "Radio Bulgarisë" në gjuhën angleze.

Përgatiti në shqip: Vesella Mançeva