Teknologjitë e larta, bujqësia, turizmi - dimëror, kulturor dhe SPA, janë fushat në të cilat marrëdhëniet midis Bullgarisë dhe Izraelit kanë tradita, por edhe potencial serioz për zhvillim - komentoi Rumjana Bëçvarova, ambasadore e vendit tonë në Tel Aviv, në një intervistë për RadioBullgarinë. Mirënjohja është fjala përmbledhëse që përshkruan qëndrimin e popullit të Izraelit ndaj Bullgarisë, shton ajo.

Tema e shpëtimit të hebrenjve dhe mediave bullgare ishte fokusi kryesor i ditës së tretë të Takimit të 17-të Botëror të Mediave Bullgare (01-03 nëntor 2022), që u mbajt në Jerusalem dhe Tel Aviv të Izraelit.

• Takimi i XVII Botëror i Mediave Bullgare filloi me një lutje në Varrin e Shenjtë 

Para fillimit të diskutimeve, delegacioni nga Bullgaria u përkul para Monumentit të Shpëtimit në Tel Aviv dhe një ditë më parë u bënë homazhe edhe në Memorialin në Qendrën Botërore të Përkujtimit të Holokaustit “Jad Vashem” në Jerusalem.

“Njerëzit në Izrael janë mirënjohës ndaj Bullgarisë çdo ditë”, tha ambasadorja Bëçvarova.

“Ata jo vetëm e shprehin me fjalë, por e tregojnë me qëndrimin e tyre jashtëzakonisht pozitiv ndaj çdo përfaqësuesi nga Bullgaria. Njerëz të rastësishëm, edhe ata që nuk kanë lidhje të drejtpërdrejtë me Bullgarinë, kur marrin vesh se jemi bullgarë, na falënderojnë që i kemi shpëtuar hebrenjtë e tyre. Dhe ky është një standard marrëdhëniesh që më duket se edhe ne duhet të mësojmë. Ne duhet të shohim se sa shumë na vlerësojnë njerëzit këtu dhe gjithashtu të kemi një qëndrim të tillë ndaj nesh. Kjo është e rëndësishme, që të mundemi të kemi forcën dhe guximin për t’i vazhduar veprat e mira.”

• Amalia Aronova: “Në Bullgari nuk kishte dallim nëse ishe bullgar apo hebre”
  

Kontaktet personale dhe besimi mes njerëzve dhe bizneseve, si dhe mbështetja që të dyja vendet i japin njëri-tjetrit në nivel ndërkombëtar, dëshmojnë për marrëdhëniet tradicionalisht shumë të mira dypalëshe. “Covid-19 thjesht ndaloi për dy vjet atë që mund të kishte ndodhur”, theksoi ambasadorja Bëçvarova, duke theksuar përpjekjet për të mbajtur kontakte, shkëmbimin e informacionit shëndetësor lidhur me pandeminë dhe bashkëpunimin në nivel shtetëror të autoriteteve të aeroportit të të dy vendeve në mënyrë që fluturimet ndërmjet Bullgarisë dhe Izraelit të mos pezullohen.

Sa i përket potencialit për zhvillimin e ardhshëm, Rumjana Bëçvarova theksoi teknologjitë e larta:

“Potenciali më i madh është në partneritetin e biznesit inovativ dhe të teknologjisë së lartë të Izraelit me bizneset bullgare që nuk janë aq të zhvilluara për momentin, krahasuar me Izraelin. Meqenëse këtu ka shumë ekspozita dhe forume për kontakte, ne i ndihmojmë përfaqësuesit nga Bullgaria të vendosin kontakte. Ka shumë mundësi dhe kuptim që marrëdhëniet të zhvillohen në këtë drejtim - kjo është e ardhmja e industrisë dhe sektorëve të tjerë, duke përfshirë marrëdhëniet në nivelin e njerëzve, biznesit, qeverive."

Fusha tjetër është tregtia, por importi i produkteve nga Bullgaria është i vështirë për shkak të kërkesës për të ashtuquajturat ushqime “kosher” (ushqime dhe pije, të cilat u përgjigjen rregullave hebraike fetare). “Në Bullgari ka importues me certifikatë, por kjo ende nuk mjafton”, theksoi Bëçvarova. Sipas saj, Izraeli aktualisht prodhon më shumë produkte bujqësore se Bullgaria dhe është shumë aktiv në tregjet evropiane.

Sfera tjetër me potencial është turizmi.

“Ajo mund të zgjerohet edhe më shumë, kështu që këtu të vijnë më shumë bashkatdhetarë, edhe pse për bullgarët është ende e shtrenjtë. Por izraelitët tregojnë interes për Bullgarinë dhe për përjetimet e reja si skijimi dhe turizmi balneo, ata janë jashtëzakonisht të interesuar edhe për turizmin kulturor. Izraelitët janë njerëz kureshtarë, në kuptimin e mirë të fjalës, dhe duan të mësojnë më shumë - diçka që Bullgaria mund t'u ofrojë atyre."

• Interesi i turistëve izraelitë për Bullgarinë po rritet 

Intervistën e mori Krasimir Martinov

Përgatiti në shqip: Vesella Mançeva