Ceremonia u hap me fjalët përshëndetëse të ambasadores së Shqipërisë në Sofje, shkëlqesia e saj znj. Inid Milo, e cila vleresoi bashkëpunimin me z. Ivan Anchev dhe z. Ervis Taluri, si dhe përkushtimin e tyre. Ajo theksoi se Dhoma e Tregtisë do të shërbejë si një urë që bashkon idetë, bizneset dhe sipërmarrjet duke ndihmuar në realizimin e projekteve të përbashkëta ekonomike. 

Dhoma e Tregtisë Bullgari-Shqipëri do të luajë një rol të rëndësishëm në fushën e investimeve si dhe mbështetjen e inovacionit në turizëm, energjinë e rinovueshme dhe tregtinë. Falë saj do të forcohet bashkëpunimi brenda komunitetit shqiptar dhe bullgar në fushën e biznesit në një hapësirë unike që lidh edhe diasporën me rrënjët e saj.

Në ceremoninë e hapjes ishin të pranishëm edhe Ambasadori i Kosovës, shkëlqesia e tij z. Haxhi Bajraktari, Ambasadorja e Maqedonisë së Veriut, shkëlqesia e saj znj. Agnesa Rusi Popovska, si dhe diplomatë të tjerë nga trupi diplomatik në Sofje, biznesmenë të njohur shqiptarë dhe bullgarë, drejtues të Universitetit Amerikan në Bullgari, drejtues të Ministrisë se Jashtme të Bullgarisë, anëtarë të diasporës dhe komunitetit shqiptar në Bullgari, studentë shqiptarë, përfaqësues të medias etj. Në këtë ceremoni ishin prezentë gjithashtu edhe z.Tsvetan Simeneov, President i Dhomës së Tregtisë dhe Industrisë së Bullgarisë, Presidenti i Ndërmarrjeve të Vogla dhe të Mesme në Bullgari, z. Vladimir Vladimirov, anëtar i Bordit drejtues të Dhomës së Tregëtisë Bullgari-Shqipëri, si dhe shumë personalitete të tjerë.

Dhoma e Tregtisë Bullgari-Shqiperi, e cila do te drejtohet nga Drejtori Ekzekutiv z. Ervis Taluri dhe z. Ivan Anchev, me Presidente të Bordit znj. Arjeta Puca, është një iniciativë që premton zhvillim, inovacion për komunitetet bullgare dhe shqiptare, dhe është një hap i rëndësishëm drejt një të ardhmeje më të ndritur dhe të bashkuar.