"Për të garantuar sigurinë për punëtorët dhe punëdhënësit, është e nevojshme përshtatja fleksibël e kuadrit rregullator. Kjo vlen për kushtet e punës, raportimin e punës dhe kontrollin e kohës së punës. Duhet të sigurohet që personi dhe të drejtat e tij të jenë në qendër të këtij transformimi dixhital. Inteligjenca artificiale mund të ndihmojë punëdhënësin, por jo të zëvendësojë detyrat e tij. Marrëdhëniet e punës janë personale dhe nuk mund t'i nënshtrohen algoritmeve."

Me ardhjen e inteligjencës artificiale, tregu i punës po ndryshon me shpejtësi, duke e bërë edhe më të rëndësishëm rolin e sindikatave. Është e rëndësishme të sigurohet aksesi i tyre në procesin e integrimit dhe përdorimit të inteligjencës artificiale në ndërmarrje - theksoi ministri përkatës.

Hyrja e algoritmeve në marrëdhëniet e punës është një kërcënim i ri për personin që punon, prandaj inteligjenca artificiale duhet të përdoret edhe për qëllime të marrëveshjeve kolektive. Nga KNSB insistojnë në zhvillimin e një Direktive për menaxhimin algoritmik në vendin e punës:

"Përzgjedhja, vlerësimi dhe kontrolli i punëtorëve nuk mund dhe nuk duhet të varet nga algoritmet e inteligjencës artificiale - thekson presidenti i KNSB-së Pllamen Dimitrov. - Një algoritëm nuk mund të na vlerësojë, as të na promovojë, një algoritëm nuk mund të na pushojë - ky është një kërcënim i ri për njerëzit. Rregullat për përdorimin e inteligjencës artificiale rrallëherë janë objekt i një marrëveshjeje kolektive. KNSB do të insistojë që rregullat për përdorimin e inteligjencës artificiale të përfshihen në marrëveshjet kolektive si një element i marrëdhënieve moderne të punës. Prandaj, sindikata do të integrojë teknologjitë e reja në aktivitetet e saj dhe do të përdorë platforma dixhitale për të organizuar veprime sindikale, si dhe do të trajnojë inteligjencën artificiale për veprimet e sindikatave”.

Zhvillimi teknologjik dhe dixhital kërkon ndryshime edhe në procesin arsimor. Sindikata këmbëngul në lidhjen e rezultateve të arsimit me kërkesat specifike të tregut të punës. Nga ana e tij, ministri i Arsimit dhe Shkencës Krasimir Vëllçev, po ashtu pjesëmarrës në konferencë, kujtoi se vetëm 25 vjet më parë, reforma në arsim kërkonte njohjen e gjuhëve të huaja, pasi anëtarësimi ynë në BE ishte i pashmangshëm. Deri më sot, fëmijët bullgarë flasin shumë mirë gjuhët e huaja, por në njohuritë e matematikës dhe shkencave natyrore, "kemi mbetur prapa":

"Parashikimet janë se në të ardhmen njerëzit nuk do të ndryshojnë vetëm punën, por do të ndryshojnë profesionet e tyre, gjë që ndryshon paradigmën e sistemeve arsimore. Inteligjenca artificiale, përveçse një shumëfishues i aftësive, do të zëvendësojë shumë më lehtë profesionet dhe punët që kërkojnë njohuri shumë të specializuara dhe do çojë para ato që kërkojnë aftësi komplekse."