Bullgaria dhe Jordania do të bashkëkryesojnë një takim të nivelit të lartë në Sofje në kuadër të "Procesit Akaba". Me ftesë të presidentit Rumen Radev dhe Madhërisë së Tij mbretit Abdullah II të Jordanisë, në fillim të prillit, krerët e shteteve, përfaqësues të qeverive, organizatave ndërqeveritare dhe joqeveritare do të diskutojnë mjedisin e sigurisë me fokus Ballkanin. 

Forumi "Procesi Akaba për Ballkanin III" është vazhdimësi e takimeve të mëparshme mbi temën - në vitin 2016 në Akaba, Jordani, dhe në 2018 në Tiranë, Shqipëri. Qëllimi i forumit në Sofje është që liderët shtetërorë nga Evropa Juglindore, së bashku me përfaqësues të qeverive dhe institucioneve, të analizojnë sigurinë në Ballkan, të diskutojnë mekanizmat rajonalë për shkëmbimin e informacionit dhe të koordinojnë përpjekjet në luftën kundër migrimit të paligjshëm, terrorizmit, radikalizimit dhe ekstremizmit.