Rënie të çmimit të gazit natyror në muajt e ardhshëm për shkak të rënies së çmimeve në tregjet botërore – këtë e parashikoi para Televizionit Kombëtar Bulgar (BNT), kryetari i Komisionit të Rregullimit të Energjisë dhe Ujit, Pllamen Mlladenovski. Sipas tij, përbërja e re e Komisionit të Rregullimit të Energjisë dhe Ujit e nisi mirë punën e tij, duke ulur çmimin e gazit me 14.3% në prill në krahasim me muajin e mëparshëm. Kjo, sipas tij, është për shkak të sasive më të lira të gazit azerbajxhanas dhe konsumit të reduktuar. Megjithatë, ai nuk u angazhua për një parashikim afatgjatë për çmimin e gazit natyror. Kryetari i ri i komisionit i cilësoi si “të pabaza” pretendimet e disa kompanive të ngrohjes qendrore për rritje serioze të çmimit të ngrohjes dhe ujit të ngrohtë nga 1 korriku i këtij viti. Lidhur me liberalizimin e planifikuar të tregut të energjisë elektrike shtëpiake nga e njëjta datë, kryetari i komisionit siguroi se konsumatorët nuk do të vuajnë. “Ekziston një skenar i gatshëm, ku me anë të kompensimit, faturat nuk do të ndryshojnë papritur”, shtoi ai.