Bullgaria nuk vendos kushte shtesë në procesin dhe negociatat e Maqedonisë së Veriut me BE-në, tha nënpresidentja Ilijana Jotova në hapjen e forumit "BE-ja takon Ballkanin" në Sofje. Në forum marrin pjesë komisionerja evropiane për zgjerimin, Marta Kos, dhe përfaqësues të qeverive të Turqisë, Rumanisë, Maqedonisë së Veriut, Bosnjë dhe Hercegovinës, Shqipërisë dhe Malit të Zi.

Jotova theksoi se marrëdhëniet dypalëshe midis dy vendeve nuk përbëjnë problem për Shkupin që të fillojë negociatat me BE-në. Ajo vuri në dukje se kjo është teza e “kolegëve tanë nga Republika e Maqedonisë së Veriut”, si dhe e disa politikanëve dhe ekspertëve evropianë, sipas të cilëve procesi është bllokuar nga të dyja palët. "Ne duam që kriteret evropiane të respektohen, ashtu siç çdo vend që ka nisur rrugën drejt anëtarësimit të vërtetë në BE i ka respektuar këto kritere", tha nënpresidentja. “Ne vazhdojmë të mendojmë se të drejtat e bullgarëve në Maqedoninë e Veriut nuk mbrohen”, theksoi Jotova dhe vuri në dukje se në marrëveshjen e arritur në vitin 2022 me BE-në, bazuar në propozimin francez, nuk ka pretendime bullgare, por kritere evropiane për anëtarësim, kryesori prej të cilave është mbrojtja e të drejtave të njeriut.