Në bregdet, interesi i blerësve është për të blerë shtëpi – në veri për të blerë vende banimi, ndërsa në jug për t'i dhënë me qira. Gjithashtu vërehet një rënie e kërkesës për hapësira tregtare, mësoi Radio Bullgaria nga agjentët e pasurive të paluajtshme në rajon.

“Lufta në Ukrainë solli një gjallërim shumë serioz të tregut, veçanërisht në qytete si Burgasi,” tregon Mariella Bonçeva – ndërmjetëse në një nga agjencitë e pasurive të paluajtshme në qytet. Ajo shton se fluksi i refugjatëve ka krijuar një interes shumë të madh për banesat me qira, gjë që ka çuar në një rritje të madhe të çmimeve në këtë sektor, në disa raste duke arritur afërsisht 100%. Bonçeva shton se kjo rritje vazhdon, por zbuloi edhe një arsye tjetër për këtë:

“Burgasi po ecën në mënyrë aktive drejt shndërrimit të tij në një qytet studentor, me zhvillimin e degëve dhe programeve të reja universitare. Kjo, logjikisht, sjell më shumë qiramarrës në qytet. Në disa spitale kanë mbërritur një numër i madh specialistësh, të cilët gjithashtu kanë marrë banesa me qira. Prandaj interesi si për qira, ashtu edhe për blerje me qëllim investimi është i madh. Sa i përket shitjeve – 2000 euro për metër katror është një kufi që tani kalohet shumë shpesh në Burgas.”

Georgi Grunov, punonjës në një nga agjencitë e pasurive të paluajtshme në Varna, tregon se në kryeqytetin tonë bregdetar kërkohen kryesisht prona për përdorim personal.

Megjithatë, çmimet e tyre e kanë kaluar kufirin prej 2000 euro për metër katror që para dy vitesh. Ai thotë se tregu është mjaft intensiv dhe shton:

“Kohët e fundit kam lexuar shumë artikuj për rritjen e çmimeve të pasurive të paluajtshme tek ne. Kjo është e vërtetë, por ritmet nuk janë më si më parë. Dy vitet e mëparshme pati një rritje shumë më të madhe. Tani ritmet janë më të qeta, më të qëndrueshme dhe më normale. Varna mbetet një nga qytetet më të zhvilluara në Bullgarinë verilindore dhe tregu është mjaft i lëvizshëm. Punojmë kryesisht me bullgarë dhe më pak me të huaj – gjermanë dhe anglezë. Së fundmi kanë filluar të shfaqen edhe rumunë, të interesuar për bregdetin tonë verior, por klienti kryesor është ende bullgari. Kërkohen kryesisht banesa për të jetuar, më pas vijnë klientët që kërkojnë për investim – për t’i dhënë me qira ose për t’i rishitur. Edhe të huajt kërkojnë shtëpi për vete. Ata duan të transferohen e të jetojnë këtu, jo thjesht të blejnë një pronë në Bullgari. Ka edhe nga ata që blejnë apartamente për të pasur ku të kalojnë pushimet. Klima dhe ambienti në Bullgari, sipas tyre, janë të favorshme,” thekson Georgi Grunov.

Ajo që na bën përshtypje është se në jug – në Burgas – blerësit e pronave për të kaluar pushimet janë kryesisht të huaj dhe bullgarë nga martesa të përziera. Ndërsa në veri – në Varna – bullgarët po orientohen drejt perifërive të qytetit, ku po lindin komplekse të reja të mbyllura. Të rinjtë që sapo kanë përfunduar shkollën e mesme po orientohen drejt blerjes së një banese, dhe jo drejt marrjes me qira, siç ndodhte vitet e kaluara.

Përmbledhja nga të dy bashkëbiseduesit tanë është se hyrja e Bullgarisë në zonën Shengen ende nuk ka ndikuar në tregun e pasurive të paluajtshme, ndërsa debatet rreth Euros kanë shkaktuar një blerje euforike të pronave. Asgjë nuk e konfirmon pritshmërinë për “shpërthimin” e flluskës së tregut dhe rënien e çmimeve, pasi kërkesa është ajo që përcakton çmimet, dhe tregu mbetet ende shumë aktiv. Edhe pse parashikimet janë të vështira, pritshmëritë më logjike janë që rritja e shpejtë e çmimeve në vitet e fundit të zëvendësohet nga një rritje më e butë, me ritme të ngadalta dhe të moderuara.

Foto: Bashkia Varna, Bashkia Burgas,  idealstroy.bg, BTA

Përgatiti në shqip dhe publikoi: Kostandina Bello