Prej 20 vitesh shkolla "Danubi" ruan të gjallë kujtimin për Bullgarinë në zemrat e nxënësve të saj

botuar më 25-05-09 7.00.PD

Foto: Shkolla Bullgare Danubi

Ndërkohë që para 20 vitesh në shkollën bullgare "Danubi" në Linz, Salzburg dhe Vels kishte vetëm 6 fëmijë, sot në tre filialet e saj shtatë mësues mësojnë 140 fëmijë. Ashtu si dhe qendra të tjera arsimore bullgare nëpër botë, edhe "Danubi" që nga krijimi i saj mbështetet në përkrahje të jashtëzakonshme nga njëra prej kishave në qytet:

"Shkolla jonë prej 15 vitesh ndodhet në kishën 'Shën Françesku'. Aty kemi klasa mësimore, ku çdo klasë, përfshirë edhe grupin parashkollor, ka dhomën e vet. Kemi edhe një sallë, ku fëmijët mund të luajnë lojëra të ndryshme, dhe një tjetër, ku zhvillojmë festimet tona, shfaqje teatrale, presim mysafirët tanë zyrtarë – tregon njëra prej mësueseve në shkollë, Snezhana Shpelingvimer, dhe shton: – Në përgjithësi, ne ndjehemi si në shtëpinë tonë në këtë ndërtesë, sado që ajo nuk është e jona dhe paguajmë qira për të."

Shkolla ka edhe një bibliotekë të pasur, në të cilën mund të gjeni mbi 1000 libra bullgarë.

Përvjetorin e saj 20-vjeçar qendra e shënon me një festë dyditore më 10 dhe 11 maj, me pjesëmarrjen e shumë mysafirëve dhe përfaqësuesve të institucioneve shtetërore, ndër të cilët MAS (Ministria e Arsimit dhe Shkencës), Agjencia për Bullgarët Jashtë Vendit dhe Ambasada e Bullgarisë në Vjenë.

"Festa do të fillojë në kishë, ku do të vijnë nxënësit dhe mësuesit tanë nga Salzburg dhe Vels. Në program është parashikuar jo vetëm një shfaqje nxënësish, por edhe një ekspozitë e përbashkët me Gjimnazin Profesional për Teknikë Precize dhe Optikë 'M.V. Lomonosov', në të cilin do të ekspozohen piktura dhe tekste nën moton 'Gjuha e urrejtjes'. Pas kësaj është pjesa solemne, në të cilën do të priten mysafirët dhe do të luhet shfaqja, drekë dhe shëtitje nëpër qytetin Linz. Në mbrëmje kemi rezervuar vende në një restorant lokal, ku do të ulemi, për të biseduar për të kaluarën dhe të ardhmen e arsimit bullgar jashtë kufijve."

Kjo ekspozitë është pjesë e projektit "Histori të patreguara. Kapërcimi i gjuhës së urrejtjes", hartuar nga drejtoresha e shkollës "Danubi", Darina Tonkova. Në kuadër të tij është parashikuar botimi i librit "Gjuha e urrejtjes" dhe një tryezë e rrumbullakët, në të cilën do të diskutohet kjo temë.

Programi festiv vazhdon edhe ditën tjetër, kur të gjithë nxënësit dhe mësuesit, së bashku me mysafirët nga gjimnazi "Lomonosov", do të marrin pjesë në një ceremoni në kompleksin përkujtimor "Mauthausen", kushtuar viktimave të regjimit nazist.

Në kompleksin përkujtimor, i cili ndodhet jo larg nga qyteti Linz, monumente ose pllaka përkujtimore kanë të gjitha shtetet, qytetarët e të cilave kanë gjetur vdekjen në ish-kampin nazist të përqendrimit. Ndër to janë edhe 20 bullgarë. Në kujtim të tyre, skulptori Ljubomir Dallçev skaliti një monument, i vendosur atje në vitin 1975. Sipas traditës, çdo vit në të dielën e dytë të muajit maj nderohen viktimat që kanë vdekur në kampin, i cili ka ekzistuar nga viti 1938 deri më 1945.

Snezhana pranon se e ka të vështirë të veçojë momente të caktuara të rëndësishme për të nga historia 20-vjeçare e shkollës, por është e bindur për këtë:

"Më e bukura është që ajo vazhdon të ekzistojë dhe të zgjerohet, që do të thotë se ne po bëjmë mirë punën tonë. Momentet e bukura janë kur shohim shkëlqimin në sytë e fëmijëve, dëshirën me të cilën vijnë në shkollë dhe flasin në gjuhën amtare, kur dalin dhe fillojnë të recitojnë poezinë e Ivan Vazovit 'Unë jam bullgar' ose ndonjë të Dora Gabes."

Një pjesë e rëndësishme e ekipit të shkollës është edhe gjyshja Petja, e cila çdo javë përgatit mëngjese të preferuara për fëmijët, ndër të cilat janë petullat, pallaçinkat dhe fetat e skuqura. Shija dhe aroma e tyre, qoftë edhe për një moment, i kthen në atdhe dhe kështu ata as edhe për një çast nuk e humbin lidhjen me të.

Fotografi: Shkolla Bullgare "Danubi" – Linz

Përgatiti në shqip dhe publikoi: Sindi Nikollofski

Последвайте ни и в Google News Showcase, за да научите най-важното от деня!

Ndaje

Prej 20 vitesh shkolla "Danubi" ruan të gjallë kujtimin për Bullgarinë në zemrat e nxënësve të saj

Më shumë nga rubrika

Ekspozitat në Muzeun Kombëtar Historiko-Ushtarak gjallërohen për festën e Ushtrisë Bullgare

Një fondacion nga Koçani i Maqedonisë së Veriut kërkon rritje të pranimeve të studentëve maqedonas në Bullgari

Gagauzët bullgarë nga Moldavia dhe Ukraina kërkojnë shtetësi bullgare

Bullgari feston Ditën e Evropës apo Ditën e Fitores?

Nxënësit bullgarë krijuan një lojë me një robot virtual detar për të luftuar mbeturinat

Platforma e Qendrës Shkencore Kirill dhe Metodij rrit nivelin e arsimit nëpër shkolla