Bullgaria do të vazhdojë të mbështesë integrimin evropian të Shqipërisë, e cila dëshmon se mund të zbatojë me sukses reformat në emër të së ardhmes evropiane të rajonit. Këtë e deklaroi presidenti Rumen Radev gjatë një takimi në Tiranë me homologun e tij shqiptar, Bajram Begaj, njofton zyra për shtyp e presidencës. Gjatë takimit, Rumen Radev theksoi se Shqipëria është një shembull pozitiv për Ballkanin Perëndimor dhe me përpjekjet dhe përparimin e saj tregon se sa e rëndësishme është që shtetet të vlerësohen mbi bazën e arritjeve të tyre në procesin e integrimit evropian.

Përmirësimi i konektivitetit rajonal është thelbësor për rritjen e sigurisë, theksuan të dy presidentët, duke veçuar rëndësinë strategjike të ndërtimit të Korridorit të Transportit Nr. 8 ndërmjet Bullgarisë, Maqedonisë së Veriut, Shqipërisë dhe Italisë.

Radev përgëzoi Begajn për realizimin e regjistrimit të popullsisë në Shqipëri në vitin 2023 në përputhje me standardet evropiane, si dhe për kushtet që institucionet shqiptare ofrojnë për ruajtjen e gjuhës, traditave dhe respektimin e të drejtave të pakicës kombëtare bullgare në vend.

Hapja e një instituti kulturor bullgar në Shqipëri dhe e një instituti kulturor shqiptar në Bullgari u theksua si një hap i rëndësishëm, për të cilin duhet të punohet.

U nënvizua gjithashtu interesi i të dyja palëve për të zhvilluar marrëdhënie miqësore në të gjitha nivelet – ekonomi, investime, siguri dhe mbrojtje, në arsim, shkencë, kulturë dhe turizëm.

Redaktoi: Ivo Ivanov

Përgatiti në shqip dhe publikoi: Svetllana Dimitrova

Foto: Presidenca