Ministria e Mjedisit dhe e Ujërave: Digat janë në nivele kritikisht të ulëta, por nuk janë shkaku i mungesës së ujit

botuar më 25-06-27 8.00.MD

Foto: BTA

Verë, temperatura të larta, gjendje pushimi. Por për fat të keq me verën nuk vijnë vetëm emocione pozitive, por edhe probleme reale dhe shumë serioze. Kështu, për shembull, gjatë vitit të kaluar 2024, mbi 400 vendbanime në të gjithë Bullgarinë, ndër të cilat disa qytete qendrore të qarqeve, mbetën "në të thatë" ose në një regjim jashtëzakonisht restriktiv të ujit. Arsyet janë të shumta, por kryesorja është një, komentoi për Radio Bullgarinë në fund të javës së kaluar klimatologu dhe pedagog në Universitetin e Sofjes, prof. Georgi Raçev – ujë te ne ka, por shteti nuk mund ose nuk dëshiron ta menaxhojë siç duhet.

Në pjesën e dytë të zhvillimit tonë mbi temën, kërkuam shtetin, për t’u përgjigjur kritikave.

Për Radio Bullgarinë zëvendësministri i Mjedisit dhe Ujërave Atanas Kostadinov paraqiti të dhëna shqetësuese – digat e mëdha me rëndësi strukturore janë më pak të mbushura se në dy dekadat e fundit, pak më keq edhe se në vitin e kaluar 2024. Por theksoi fort – kjo nuk është arsyeja për mungesën e ujit.

E vërteta është se vëllimet në ditën e sotme në digat komplekse dhe me rëndësi, të cilat janë për këto nevoja (ujë i pijshëm, ujitje, energjetikë), janë më të ulëtat në 20 vitet e fundit. Pyetja është, megjithatë, në çfarë gjendjeje ndodhemi. Vëllimi i përgjithshëm i ujit të grumbulluar që ndodhet në to është rreth 4.5 miliardë metra kub, që përfaqëson pak më pak se 70% të kapacitetit të tyre të përgjithshëm, megjithëse tendenca është kritike. Kjo është më e lartë me 2-3% se muaji i mëparshëm dhe vetëm rreth 3-4% më pak në krahasim me vitin e kaluar. Po, vazhdon tendenca për mungesë kritike të burimeve ujore, por mendoj se ndodhemi në një situatë, në të cilën, me planifikim të arsyeshëm, nuk mund të presim një situatë kritike për furnizimin me ujë të pijshëm dhe për nevoja shtëpiake," qetësoi megjithatë ai.

Sipas fjalëve të zëvendësministrit, problemi me mungesën e ujit është shumëplanësh, por në asnjë mënyrë nuk vjen nga digat, por nga sistemi i ujësjellësit i vjetëruar, në të cilin ka humbje të mëdha.

"Gjatë vitit të kaluar, asnjë nga digat që përdoren për furnizim me ujë të pijshëm dhe për nevoja shtëpiake nuk ka qenë arsye për mungesën e ujit. Nuk ka pasur mungesë të burimit ujor që të çojë në mungesë uji. Arsyet janë jashtëzakonisht komplekse, varen nga shumë faktorë. Nëse duhet t’i renditim sipas rëndësisë, peshës dhe sipas asaj se cila është arsyeja më serioze, do t’ju citoj disa të dhëna: humbjet, të shpallura zyrtarisht nga ndërmarrjet e ujësjellësit në Shumen, Pernik, Sliven dhe Montana, arrijnë deri në 83%. Sigurisht, kjo është arsyeja kryesore. Ajo është jashtë kompetencave të Ministrisë së Mjedisit dhe Ujërave, por detyra e Ministrisë është të koordinojë përdorimin e ujërave për nevoja të pijshme, për ujitje dhe për nevoja energjetike."

Kostadinov dha shembull edhe me ndërmarrjen e ujësjellësit të Plevenit, ku Ministria e Mjedisit dhe e Ujërave ka lëshuar madje më shumë ujë nga sa ka kërkuar ndërmarrja, gjë që tregon qartë se arsyet janë teknike, pra defekte, dhe jo mungesë uji. Dhe shtoi – humbje të mëdha uji ka jo vetëm në rrjetin e ujësjellësit.

"Këtë vit, duke qenë edhe më i thatë se ai i mëparshmi, nuk është shumë ndryshe prej tij. Humbjet e mëdha të ujit mund të ndodhin në çdo moment për shkak të rrjetit të komprometuar, të vjetëruar – moralisht dhe fizikisht, të ujësjellësit. Ka edhe një shembull tjetër që nuk ka të bëjë me furnizimin me ujë të pijshëm dhe shtëpiak. Për sa i përket ujërave për ujitje, kemi të dhëna që tregojnë në disa vende humbje mbi 90% të ujit."

Zëvendësministri Kostadinov premtoi: sa i përket punës së dikasterit të tij, nuk do të lejohet përsëritje e vitit të kaluar të thatë.

"Rreth 1.1 miliardë metra kub është vëllimi i përgjithshëm i digave për ujë të pijshëm. Pra, po, regjistrojmë një vit më të thatë, ndërkohë kemi 72% mbushje. Dhe ne për momentin jemi plotësisht të sigurt se në mënyrën si po punojmë, kjo nuk do të jetë arsye për krizë uji," qetësoi nënkryetari i Ministrisë së Mjedisit dhe Ujërave.

Prej një kohe të caktuar shteti po bën përpjekje shtesë për ta zgjidhur të paktën pjesërisht problemin. Që prej 3 muajsh, me urdhër të kryeministrit Rosen Zheljazkov, çdo muaj zhvillohen takime koordinuese midis Ministrisë së Mjedisit dhe Ujërave, Ministrisë së Zhvillimit Rajonal dhe Infrastrukturës, Ministrisë së Bujqësisë, si edhe dikasterit energjetik, për të përcaktuar në mënyrë optimale sasinë e ujit që shteti shpërndan për çdo drejtim – nevoja të pijshme, ujitje dhe energjetikë.