Ka kaluar gjysmë shekulli që nga vendosja e marrëdhënieve diplomatike midis Kinës dhe Bashkimit Evropian – një partneritet që ka dimensione reale në aspektin ekonomik: "Tregtia midis Kinës dhe Evropës është rritur nga 2.4 miliardë në gati 786 miliardë dollarë, dhe aktualisht vëllimi i saj ditor është i barabartë me vëllimin vjetor të së kaluarës. Investimet dypalëshe janë rritur nga pothuajse zero në gati 260 miliardë dollarë" – tha në një intervistë për Radion Kombëtare Bullgare, Ambasadorja e Kinës në Bullgari – Shkëlqesia e saj Dai Qingli.

Një tipar dallues i marrëdhënieve dypalëshe kohët e fundit kanë qenë mosmarrëveshjet mbi një sërë temash - ekonomike, tregtare, përfshirë luftën në Ukrainë, dhe takimi dypalësh në Pekin disa ditë më parë i shtyu analistët të bëjnë konkluzionin se marrëdhëniet Bruksel-Pekin janë në një fazë të "riorganizimit strategjik".

Marrëdhëniet midis Bashkimit Evropian dhe Kinës kanë arritur në një "pikë kthese të qartë", tha Presidentja e Komisionit Evropian Ursula von der Leyen, pas një samiti njëditor të tensionuar në Pekin më 24 korrik. Udhëheqësit evropianë ngritën një numër çështjesh kyçe mbi çekuilibrin e tepërt tregtar (BE-ja raporton një deficit tregtar rekord me Kinën prej 305.8 miliardë eurosh në vitin 2024), masat kufizuese mbi importet e makinave elektrike dhe aksesin e vështirë në tregun kinez për kompanitë evropiane. U nënshkrua një deklaratë e përbashkët mbi çështjet klimatike, me të dyja palët që u zotuan për bashkëpunim më të ngushtë në tranzicionin energjetik, teknologjitë me karbon të ulët dhe menaxhimin e emetimeve të metanit.

"Kina gjithmonë i ka parë marrëdhëniet e saj me Evropën në plan afatgjatë. Lidhjet tona janë një nga marrëdhëniet dypalëshe më me ndikim në botë, të cilat sjellin përfitime reale për gati 2 miliardë njerëz në Evropë dhe Kinë dhe kontribuojnë ndjeshëm në paqen dhe zhvillimin global", tha ambasadorja Dai Qinqli për Radion Kombëtare Bullgare, duke shtuar se ndryshimet në sistemet shoqërore, ideologjinë, historinë, kulturën dhe nivelin e zhvillimit midis Kinës dhe Evropës nuk duhet të jenë arsye për konfrontim: "Kina dhe Evropa janë partnere, jo kundërshtare, vende që krijojnë mundësi për njëra-tjetrën, jo kërcënime."

Cili është vizioni aktual i Kinës për bashkëpunimin me vendet e Evropës Qendrore dhe Lindore, dhe konkretisht me Bullgarinë?

"Kina i kushton një rëndësi të madhe zgjerimit dhe thellimit të marrëdhënieve me vendet e Evropës Qendrore dhe Lindore dhe është e gatshme të vazhdojë të rrisë importet prej tyre dhe të ndajë mundësitë e ofruara nga tregu i saj dhe zhvillimi i saj. Ne jemi të gatshëm të punojmë me vendet e Evropës Qendrore dhe Lindore për të forcuar bashkëpunimin në fusha të tilla si lidhja e infrastrukturës, financat, turizmi, bujqësia, industritë e gjelbra dhe energjia e re, nga të cilat përfitojmë të gjithë."

Kina e sheh Bullgarinë si një partner të rëndësishëm në Evropën Qendrore dhe Lindore dhe një pjesëmarrëse dhe ndërtuese të rëndësishme të marrëdhënieve tona me Evropën në tërësi. Bullgaria është një nga vendet e para që iu bashkua Iniciativës "Një Brez, një Rrugë", si dhe një lider në bashkëpunimin bujqësor. Vendi juaj ka arritur anëtarësim të plotë në Marrëveshjen e Shengenit dhe është në prag të bashkimit me eurozonën, gjë që zgjeron pikat e konvergjencës dhe perspektivat për bashkëpunimin tonë. Shpresojmë që të dy vendet do të punojnë së bashku në fushat e mëposhtme:

Së pari, forcimi i mëtejshëm i shkëmbimit. Kina mirëpret Bullgarinë që t'i bashkohet Grupit të Miqve për Bashkëpunim Ndërkombëtar në Ndërtimin e Kapaciteteve të Inteligjencës Artificiale për të ndarë përfitimet e këtyre teknologjive të reja. Ne gjithashtu mirëpresim Bullgarinë që t'i bashkohet Organizatës Ndërkombëtare të Ndërmjetësimit për të luajtur një rol aktiv në zgjidhjen paqësore të mosmarrëveshjeve ndërkombëtare.

Së dyti, zhvillimi i mëtejshëm i tregtisë dypalëshe. Bullgaria ofron shumë produkte të veçanta bujqësore dhe ushqimore, siç janë vaji i trëndafilit, produktet e qumështit, vera dhe uji mineral. Kohët e fundit, shafrani bullgar fitoi akses në Kinë. Unë besoj se gjithnjë e më shumë produkte bullgare do të hyjnë në tregun tonë.

Së treti, zhvillimi i mëtejshëm i bashkëpunimit në fushën e energjisë së pastër.

Së katërti, forcimi i mëtejshëm i bashkëpunimit në fushën e transportit dhe logjistikës. Bullgaria ndodhet në udhëkryqin e Kinës dhe Evropës, gjë që i jep asaj avantazhe unike gjeografike. Vendet tona kanë nevojë dhe ekziston një konsensus midis tyre për të forcuar lidhjen dhe për të hapur kanalin logjistik Kinë-Evropë. Ne besojmë se vendet tona kanë potencial të madh për bashkëpunim në ndërtimin e kanaleve ndërkombëtare të transportit përmes Detit Kaspik dhe Detit të Zi, duke përmirësuar kapacitetin infrastrukturor të Bullgarisë dhe duke zhvilluar më tej transportin hekurudhor të mallrave midis Kinës dhe Evropës" - tha në përfundim ambasadorja e Kinës në Bullgari Shkëlqesia e Saj Dai Qingli. 

Mësoni më shumë për marrëdhëniet bullgaro kineze nga arkivi i Radio Bullgarisë:

• Momçillovci, ose Musilijan - pse kinezët e duan fshatin piktoresk në malin e Rodopeve

• Shkëlqesia e Saj Daj Cinli: Bullgaria dhe Kina kanë bashkëpunim praktik të cilin shpresojmë ta thellojmë

• Bullgaria është lider në Evropën Qendrore dhe Lindore përsa u përket eksporteve të produkteve bujqësore në Kinë

• Një këngë bullgare u luajt në hapjen e Festivalit të parë Ndërkombëtar Kulturor të Trëndafilit në Kinë

• Jusjan Lin – një kineze e cila ka vendosur të studiojë jetën politike bullgare

• Krijues bullgarë dhe kinezë bashkë në rrugën e mëndafshit

Përgatiti në shqip dhe publikoi: Vesella Mançeva

Foto: BGNES, AP/BTA, Reuters, bg.china-embassy.gov.cn, Facebook/Embassy of China in Bulgaria