“Në të vërtetë, një astronom i madh rus – Pavell Hollopov, në vitin 1953 ka bërë llogaritjet e para pa ato kompjuterë të fuqishëm që kemi sot, dhe ka vërejtur këtë tendencë të ndryshimit të elipticitetit nga qendra drejt periferisë. Astronomët pas tij, megjithatë, nuk i kanë kushtuar vëmendje kësaj dhe kanë filluar të marrin një vlerë mesatare për formën e grupimit yjor, sepse në shumicën e katalogëve matjet bëhen vetëm në një distancë të caktuar nga qendra.” 

Në bazë të studimit të tyre të hollësishëm, shkencëtarët bullgarë arrijnë të përcaktojnë edhe moshën e grupimit yjor – 13,2 miliardë vjet. Sipas të dhënave të fundit, që janë nga viti 2010, M2 është jo më shumë se 12,5 miliardë vjet. Dr. Petrov shpjegon: 

“Pse është interesante kjo? Sepse grupimet yjore të tipit sferik janë formacionet më të vjetra në galaktikë dhe në univers në përgjithësi, dhe prej tyre mund të gjykojmë për kufirin më të ulët të moshës së vetë universit. Duhet të mendohet edhe për një teori më të përmirësuar, e cila të shpjegojë pse grupimi yjor është më i shtypur në qendër, ndërsa në periferi – më i rrumbullakët, gjë që është e çuditshme! Do të prisnim të ishte e kundërta, pasi gjatë pesëqind milionë viteve të fundit ai është afruar tre herë me qendrën e galaktikës dhe për shkak të ndërveprimit me të, do të duhej të ishte më i shtypur në periferi. Duhet të zhvillohet një teori që të shpjegojë këtë ndryshim.” 

Dhe ndërkohë që rezultatet e studimit, tek të cilat arrijnë astronomët vendas, hapin horizonte të reja për njohuri, ata tashmë përgatisin fazën e ardhshme të projektit të tyre, duke zhvilluar një program kompjuterik të vetin, për të rritur saktësinë e matjeve të tyre.