Më 15 shtator 2025, Ambasadorja e Federatës Ruse në Sofje, Eleonora Mitrofanova, u thirr në Ministrinë e Punëve të Jashtme në lidhje me shkeljen e qëllimshme të hapësirës ajrore të Polonisë, një aleat i Bullgarisë në NATO dhe partner i BE-së, nëpërmjet hyrjes së dronëve ushtarakë rusë më 10 shtator 2025. Kjo u raportua nga Ministria e Punëve të Jashtme Bullgare. Drejtoresha e Përgjithshme për Çështjet Politike të Ministrisë së Punëve të Jashtme, Gergana Karaxhova, i dorëzoi një demarsh me shkrim Ambasadores Mitrofanova, përmes të cilit Bullgaria dënon kategorikisht shkeljen e qëllimshme të hapësirës ajrore të Polonisë dhe shpreh solidaritet me aleatin e saj.

"Bullgaria i sheh këto veprime të papërgjegjshme të palës ruse, përfshirë hyrjen e një droni rus në hapësirën ajrore rumune më 13 shtator 2025, si një kërcënim për sigurinë e qytetarëve evropianë, stabilitetin rajonal dhe paqen ndërkombëtare", vuri në dukje Ministria jonë e Punëve të Jashtme. Në një njoftim për shtyp nga Ministria e Punëve të Jashtme, ajo gjithashtu deklaroi: "Bullgaria i bën thirrje palës ruse të ndalojë menjëherë sulmet e saj kundër Ukrainës dhe provokimet e rrezikshme kundër vendeve evropiane dhe të angazhohet seriozisht në negociata kuptimplote për t'i dhënë fund armiqësive si një hap i parë drejt vendosjes së një paqeje të qëndrueshme dhe të drejtë."

Ambasadorja Mitrofanova i hodhi poshtë akuzat si të pabaza dhe theksoi mungesën e asnjë prove për përfshirjen e Rusisë në incidentin në Poloni. Ajo tërhoqi vëmendjen për faktin se Forcat e Armatosura të Federatës Ruse nuk kishin planifikuar të godisnin objektiva në territorin e Polonisë. Ambasadorja Eleonora Mitorfanova informoi se rrezja e fluturimit të dronëve të përdorur gjatë sulmit ndaj infrastrukturës ushtarake ukrainase natën e 10 shtatorit 2025 nuk i kalonte 700 kilometrat, gjë që e bën të pamundur hyrjen e tyre në territorin polak, vëren faqja e Facebook-ut e Ambasadës Ruse në vendin tonë. Sipas ambasadores, ky është një provokim i planifikuar, në të cilin është kryesisht e interesuar Ukraina, si dhe vendet evropiane që po përpiqen të bashkojnë shoqërinë rreth "kërcënimit rus".

Redaktoi: Miglena Ivanova

Përgatiti në shqip dhe publikoi: Vesella Mançeva

Foto: BTA, BGNES