Ka një rritje të madhe të importit të punëtorëve nga vendet e treta, dhe deri në fund të vitit pritet të arrihet shifra prej 50 mijë vetash. Mungesa e fuqisë punëtore mbetet një problem i përhershëm, tha për radion BNR Georgi Përvanov – ekspert për burimet njerëzore, anëtar i Bordit Drejtues të Shoqatës Bullgare për Menaxhimin e Burimeve Njerëzore dhe të Konfederatës Bullgare të Punësimit.

"Me shumë gjasë, që nga viti i ardhshëm do të shohim punonjës nga vende të treta që do të ndihmojnë në shkolla, spitale dhe vende të tjera", komentoi Përvanov, duke shtuar se probleme ka edhe në transportin urban të Sofjes. "Që kur merrem me burime njerëzore, nuk kam parë ndonjëherë një kthim të tillë të bullgarëve nga jashtë. E shohim çdo ditë – po kthehen. Ende nuk po kthehen më të kërkuarit – ata që janë në segmentin më të ulët: stafi i shërbimit, operatorët, punëtorët. Por në segmentin e mesëm të ekspertëve dhe në nivelin më të lartë, vala është shumë e madhe," theksoi ai. Sipas tij, 90% e atyre që kthehen janë persona që kërkojnë punë në Bullgari. "Ka gjithnjë e më shumë njerëz që janë aq të zhgënjyer nga ajo që shohin në Paris, Bruksel, Gjermani, saqë kthehen edhe pa pasur një punë të sigurt – vijnë dhe nisin të kërkojnë punë këtu. Por pjesa më e madhe janë të përgatitur që jashtë dhe kthehen me një ofertë konkrete pune", komentoi Përvanov.

• Fillon pranimi i dokumenteve në kuadër të iniciativës për kthimin e bullgarëve nga jashtë vendit