"Një moment historik për Bullgaristikën në SHBA!" – me një postim me këtë titull, konsulli i përgjithshëm i Bullgarisë në Çikago, Svetosllav Stankov, njoftoi lajmin se më 20 tetor 2025, në Universitetin e Illinois-it në Urbana-Champaign, nis programi i bullgaristikës, i shpallur më herët gjatë këtij viti.

• Bullgaristika rikthehet në hartën akademike të Amerikës

Në kuadër të iniciativës pilot, e realizuar me mbështetjen e Ministrisë së Arsimit dhe Shkencës së Republikës së Bullgarisë, studentët do të kenë mundësinë të zgjedhin nga disiplinat Gjuha bullgare për studentët me prejardhje bullgare (LCTL 201) dhe Hyrje në gjuhën bullgare (LCTL 101). Ndërsa në pranverën e vitit 2026 do të fillojë edhe një kurs për historinë dhe kulturën bullgare.

Pedagogia e parë në programin e bullgaristikës është Dr. Ilijana Dimitrova nga Universiteti i Veliko Tërnovos “Shenjtorë Kirill dhe Metodij”.

Dr. Dimitrova u përzgjodh nëpërmjet një konkursi kombëtar të organizuar nga Ministria e Arsimit dhe Shkencës së Republikës së Bullgarisë, lexojmë në një artikull hyrës të Universitetit të Illinois-it. Në Universitetin e Veliko Tërnovos “Shenjtorë Kirill dhe Metodij”, Ilijana Dimitrova është pedagoglektore e gjuhës bashkëkohore bullgare. Përveç punës së saj si pedagoge në Bullgari, ajo ka përvojë edhe si lektore e ftuar në universitete të huaja – në Spanjë, Gjermani dhe Çeki.

"Studentët bullgarë janë pjesë e komunitetit akademik të Illinois-it që nga viti 1911 – dhe tani, pas një ndërprerjeje të gjatë, ëndrra shumëvjeçare për të studiuar gjuhën dhe kulturën bullgare bëhet sërish realitet!" – thotë konsulli ynë i përgjithshëm, Svetosllav Stankov, dhe i uron pedagoges së parë universitare në Illinois "frymëzim dhe sukses në këtë mision fisnik – të zbulojë bukurinë e gjuhës, kulturës dhe historisë bullgare për një brez të ri studentësh".

Një prioritet tjetër i programit pilot të bullgaristikës në Illinois është lidhja e studentëve amerikanë me universitetet bullgare. Verën e kaluar, me ftesë të qeverisë bullgare, dy doktorantë nga Universiteti i Illinois-it morën pjesë në programin e njohur “Seminari Ndërkombëtar Veror”, i cili ofrohet çdo vit prej më shumë se pesëdhjetë vjetësh nga universitetet bullgare.

Afati për regjistrim në kursin e gjuhës bullgare në Universitetin e Illinois-it është deri më 24 tetor, ndërsa informacion të mëtejshëm të interesuarit mund ta marrin duke shkruar në: reec@illinois.edu

"Ftoj të gjithë studentët bullgarë në universitet që të përfshihen aktivisht në program dhe të ftojnë miqtë e tyre të regjistrohen së bashku me ta!" – shkruan në përfundim konsulli i përgjithshëm i Bullgarisë në Çikago, Svetosllav Stankov.

Lexoni më shumë nga koleksioni i Radio Bullgarisë:

• Studimet e bullgaristikës në Gjeorgji po bëjnë hapa të vogla, por të sigurta

• Lektoratet e gjuhës bullgare luajnë një rol të rëndësishëm në "ndezjen" e interesit drejt Bullgarisë në mbarë botën

• Jashtë vendit kanë mbetur vetëm 39 lektorate të gjuhës bullgare

• Prof. i Asociuar Marco Scarpa: Gjuha dhe alfabeti nuk duhet të shërbejnë për të kundërshtuar njëri-tjetrin, por duhet të vlerësohen si një pasuri e përbashkët

Redaktoi: Krasimir Martinov

Përgatiti në shqip dhe publikoi: Svetllana Dimitrova

Foto: Facebook/Iliyana Dimitrova, Facebook/Svetoslav Stankov, illinois.edu