Bashkim. Dhe gëzim, eufori, mbështetje, shpresë. Por mbi të gjitha, bashkim. Kjo u shkaktua nga triumfi i ekipit tonë kombëtar të volejbollit për meshkuj, i cili për herë të parë pas 55 vitesh arriti vendin e dytë në Kampionatin Botëror të Volejbillit në Filipine. Dhjetëra mijëra bullgarë u mblodhën para tempullit-monument "Shën Aleksandër Nevski" dhe miliona të tjerë para ekraneve për të mirëpritur heronjtë tanë të volejbollit.

"Luanët" arritën vendin e dytë, duke fituar medaljen e argjendtë, pasi mposhtën radhazi Gjermaninë, Slloveninë, Kilin, Shtetet e Bashkuara dhe Republikën Çeke, dhe në finalet me Italinë treguan shpirt, megjithëse humbën 1:3 sete.

• Bullgaria u rikthye në hartën botërore të volejbollit – pas 55 vitesh është përsëri e argjendtë!

Dhe ndërsa vetë lojtarët ende po përpiqeshin ta kuptonin dhe ta shprehnin me fjalë arritjen e tyre të jashtëzakonshme, e gjithë Bullgaria tashmë po i pranonte si heronj. Si një gjest mirënjohjeje, sportistët tanë u pritën në Stamboll, pas fluturimit të tyre nga Filipinet, nga Ministri i Sportit Ivan Peshev, së bashku me avionin qeveritar, dhe i çuan në Atdhe.

"Një sukses i jashtëzakonshëm! - komentoi Kryeministri Rosen Zheljazkov. - Suksesi në fakt ka dy dimensione. Dimensioni i parë është se këta janë kampionët tanë. Në finale, pamë sa shumë përpjekje, por në të njëjtën kohë qetësi kishte në ekip. Natyrisht, tensioni sportiv është i madh, por ky ekip, potenciali, të rinjtë, japin garanci për suksesin e ardhshëm. Dhe dimensioni tjetër - kombi ishte i bashkuar, ishte së bashku, ishte një popull!".

• Në terminalin qeveritar në Sofje pritën volejbollistët bullgarë

Kulmi i festimeve me rastin e suksesit të ekipit kombëtar, megjithatë, erdhi më vonë, përtej retorikës së politikanëve. Pas disa orësh pushimi në tokën vendase, ekipi më i ri në Kupën e Botës pati mundësinë të ndjejë euforinë e emocioneve që shoqëria bullgare nuk i ka shprehur kaq dhunshëm që nga vera e nxehtë e vitit 1994, kur ekipi ynë i futbollit arriti vendin e katërt në botë.

• Bullgaria priti solemnisht legjendat e saj të reja të volejbollit

Ekipi ynë kombëtar bëri një turne kampionati në Sofje, i cili përfundoi mes duartrokitjeve të stuhishme të mijëra njerëzve që i prisnin përpara tempullit “Shën Aleksandër Nevski”. I gjithë udhëtimi i tyre u transmetua në mure të mëdha video dhe deri në mbërritjen e tyre kishte një program muzikor, në të cilin morën pjesë dhjetëra interpretues, përfshirë “Fondacionin”, Vëllezërit Argirovi dhe të tjerë.

"E bëtë Bullgarinë të qajë nga gëzimi. Ju falënderojmë nga zemra dhe ju urojmë një të ardhme të ndritur në volejboll. Sepse ajo që demonstruat ishte e jashtëzakonshme" - i përshëndeti legjenda e volejbollit Dimitër Karov, i cili 55 vjet më parë ishte ndër të parët medalistë argjendi të ekipit kombëtar të volejbollit, ai është gjithashtu bullgari i parë që u pranua në Sallën Botërore të Famës së Volejbollit.

"Jam jashtëzakonisht i lumtur që arritëm ta bashkojmë kombin dhe që të gjithë ju jeni këtu për të ndarë suksesin e një vendi", tha kapiteni i ekipit tonë të volejbollit, Aleks Grozdanov, para njerëzve që thërrisnin "Bullgarët janë heronj".

"Jam shumë i emocionuar dhe me të vërtetë nuk mund ta besoj atë që shoh këtu. Kjo është Bullgaria! Dhe meqenëse unë dhe i gjithë ekipi e shohim këtë, nuk mund të mos duam të jemi përsëri këtu verën e ardhshme dhe të fitojmë medalje për Bullgarinë. Ju premtojmë një gjë - ndërsa luajmë për Bullgarinë, të gjithë këtu janë gati të vdesin në fushë", tha një tjetër yll i yni, Simeon Nikollov.

"Pjesa më e vështirë sapo ka filluar", përmblodhi trajneri Gianlorenzo Blengini pas mbërritjes në Sofje. Argumenti - pritjet e larta që ai tashmë ka për ekipin, si dhe fakti që çdo kundërshtar do të dëshirojë t'i mposhtë ata me çdo kusht. Në shesh, trajneri u ngrit në krahë nga djemtë dhe fjalët e tij ishin lakonike, të thëna në anglisht dhe bullgarisht:

"Jam vërtet pa fjalë. Faleminderit! Nuk e di... Bullgarë, heronj, bullgarë, heronj!" brohoriti italiani, duke provokuar një reagim emocional midis mijëra njerëzve në shesh.

Dhe djemtë e ekipit premtuan se nëse fitojnë një titull olimpik, do të ngrenë me dorë edhe presidentin e Federatës së Volejbollit, Ljubomir Ganev. Vetë Ljubomir Ganev komentoi për Radio Bullgarinë:

"Nuk mund të them nëse rinia ishte një avantazh, por kjo skuadër la përshtypjen më të madhe në Kampionatin Botëror. Absolutisht të gjithë presidentët e federatave, presidenti i Federatës Ndërkombëtare thanë: "Ljubo, keni një skuadër të shkëlqyer!". Kjo u vu re nga të gjithë. Rinia nuk mund të jetë një ves, këta djem janë të lidhur ngushtë, ata jetojnë për njëri-tjetrin. Dhe talentet lindin në klube. Prandaj duam të kemi një kampionat të mirë në të cilin të luajnë më shumë bullgarë, prandaj nuk kemi më shumë se tre lojtarë të huaj në fushë."

Dhe duke folur për talentet, pikëshënuesi i njohur numër 1 i Kupës së Botës, Aleksandër Nikollov, foli për Radio Bullgarinë:

"Ne i ndiqnim mediat, e dinim se pritja do të ishte e mrekullueshme, por kjo i tejkaloi të gjitha pritjet. Rinia e skuadrës sigurisht që kontribuoi. Të shohësh kaq shumë njerëz në një vend, të cilët erdhën për ekipin tonë, është thjesht e pabesueshme", tha më i madhi nga dy djemtë e legjendës sonë të volejbollit, Vlladimir Nikollov.

Në njoftimin paraprak të ngjarjes thuhej shprehimisht se nuk do të kishte pjesëmarrje serioze politike. Dhe vërtetë nuk kishte, të paktën për sa u përket përfaqësuesve të qeverisë dhe parlamentit. Midis të pranishmëve ishin kryetari i bashkisë së Sofjes, Vasill Terziev,dhe një numër këshilltarësh bashkiakë nga pothuajse të gjitha grupet në Këshillin Bashkiak të Sofjes, por ata nuk morën pjesë në ceremoninë zyrtare. Megjithatë, kryetari i bashkisë së Sofjes dha një koment të shkurtër për ngjarjen për Radio Bullgarinë:

“Kjo ishte një festë e shpirtit bullgar, e asaj që na bashkon. Do të doja të kishim shumë më tepër raste për të kujtuar se gjërat që na bashkojnë janë shumë më tepër sesa ato që na ndajnë. Le të bëhemi më të zgjuar në mënyrën se si kalojmë nëpër konflikte, nëpër keqkuptime, në mënyrë që të bëjmë më të mirën për brezat e ardhshëm. Si në sport, ashtu edhe në të gjitha fushat e jetës sonë."

Pas stuhisë së emocioneve, tifozët e volejbollit tashmë mezi i presin sfidat e radhës - suksese të reja nga ekipi ynë kombëtar i volejbollit në Ligën e Kombeve, e cila do të mbahet në qershor 2026. Ekipi do të luajë para një publiku vendas vjeshtën e ardhshme në Varna, në Kampionatin Evropian të Volejbollit, të cilin Bullgaria do ta presë, së bashku me Italinë, Rumaninë dhe Finlandën.

Përgatiti në shqip dhe publikoi: Vesella Mançeva

Foto: Ivan Gergov, BTA, bvf.bg